吳偉豪：個樣真係幫到我！
吳偉豪（Ricco）乃無綫藝員訓練班的畢業生，現時獲公司力捧的他，除了是包薪合約藝人外，更已被派演有戲份的角色，「少年版吳彥祖」Ricco外表斯文，卻是跆拳道黑帶高手，現時更學習正宗詠春，亦是葉問弟子門下。
廿年前的藝人，十個有八個都是藝員訓練班出身，不過現時多了如港姐及香港先生等這些入無綫做藝人的渠道，由訓練班入行而又獲公司力捧的，真的少之又少，而「少年版吳彥祖」吳偉豪（Ricco）是無綫28期藝員訓練班的畢業生，現時只得18歲的他，在《愛‧回家之八時入席》中，飾演林禾一角，即鍾景輝的孫兒。
有劇拍「以為我走後門」
Ricco畢業不久便擔演有戲份的角色，算是幸運的一位！Ricco俊朗年輕的面孔，樣子有點似混血兒，但原來他是百分百香港人，由細到大，他就讀國際學校，家中四兄弟，可謂「全男班」。他受訪時說：「其實18歲有戲做已經好滿足，我本身好鍾意睇電影，好多師姐師兄知我咁快入劇組，都問我係咪識人，以為我走後門。（有冇唔開心？）都有少少，不過唔緊要，時間可以證明一切。」
說到其俊朗「小鮮肉」面孔是其大優勢，他笑說：「我個樣真係幫到我好多，鬼鬼哋，好多人話我似吳彥祖，不過依家同好多前輩合作，好似黎耀祥、毛舜筠，佢哋都叫我唔好急，慢慢嚟！」冇錯，現時才18歲，青春永遠是最好的籌碼。
跆拳高手學埋詠春
Ricco外形斯文，其實他是跆拳道黑帶高手，現時跟招家泉師傅學習正宗葉問詠春，問到為何會學習詠春？他說：「我哋訓練班老師係鄭丹瑞，佢都有叫我哋學功夫，自己都睇過有關詠春嘅電影，好鍾意正宗武術，自己身形比較瘦，不過平時有做開Gym，要練番大啲個骨架，而且學詠春腕骨要好紮實，所以自己都要多加練習。」拍攝當日，他跟招師傅練習打五手樁，又在梅花樁黐手，他練習用的木樁是世界獨一無二，由招師傅親自設計，木亦是由美國運到，此外，他亦有跟師博練習八斬刀及六點半棍，相當有勁！
服裝：Harmont&Blaine/7 For All Mankind
場地鳴謝：詠春奧秘（何聯）
文：影視組