夏尉喻出「陰」招谷胸
藝人夏尉喻（Barbie）、陳慧珊（Flora）、貝安琪及陳倩揚等前晚出席電影《C奶同學會》首映，清減不少的Barbie穿吊帶背心配短裙露三吋事業線搶鏡。Barbie表示早前因賀爾蒙問題令身形腫脹，結果花一年時間調理身體，再加上現在兼任歌手經理人，頻撲工作下消瘦不少，問到她減多少磅？她說：「冇特別去check，都係着番嗰啲衫。（身材呢？）咁就有，頭先都好努力去谷，但又唔係好有效果，你哋都冇嘩然，bra都係一樣，但就要打陰影。」
陳慧珊「博士」有排讀
Barbie指兼任經理人仍會繼續幕前演出：「keep住登台同商演，之前有拍內地劇，亦有人畀劇本我睇，成事就年底或明年開拍。（兩邊兼顧好辛苦？）以前做女時會有堅持，依家做經理人就會有好多妥協，終於感受到我個前經理人好偉大。」
正修讀教育博士課程的Flora，透露有收看近日深宵重播其有份演出的劇集《創世紀》，她稱要照顧女兒及進修，暫未考慮拍劇。問到博士學位尚要修讀多久？她笑說：「依家先第2年，最快4年完成，大部分都係5至7年，所以如果4年完成已好犀利。」