甄子青一顆丹心兄妹情追落後

子青與子丹一樣，自小受雙親的悉心栽培，甄母是第一位在美國波士頓開武館的中國女性，甄父則為文化人，琴棋書畫樣樣皆精，養成兄妹倆文武雙全。而子青身上正好體現出這兩種看似極端的氣質，身材嬌小、說話陰柔的她打拳擊時出腳雄渾有勁，耍起中國功夫則剛中帶韌。

自幼習武童年刻苦

功夫，對子青來說，不是一種選擇，而是命定。

子青直言兒時遭受歧視時，都會好渴望哥哥能在身邊保護她。	子青對電影業甚感興趣，除參演幕前外更開製作公司寫劇本。	放大圖片

「我由四歲開始跟媽咪學功夫，每日放學就會去武館練習，就好似小朋友放學做功課一樣，而且經常都有表演，每日嘅時間表都排到密麻麻，試過暑假要去深圳武館訓練，一星期訓練六日。功夫對我嚟講係生活一部分，我冇諗過點解要做同背後嘅意義，當時年紀太細唔識珍惜，只係覺得好辛苦，會諗點解我唔可以好似其他小朋友咁去玩或者同朋友一齊開party？直到大咗先發現其實我屋企幾特別，依家反而會好珍惜自己有個咁獨特嘅成長背景。」

年逾40歲的子青一臉童顏，令網友驚嘆。	身材嬌小的甄子青功夫了得，出腳雄渾有勁！	子青表示小時候常受到老外挑釁。

歧視挑釁獨力承受

一個懂得功夫的女生，在今天看來，會讓人覺得很型，但在30多年前，一個懂得中國功夫的中國女生在外國人眼中，卻是異類。

醉心武術的子青耍功夫時剛中帶韌。	兒時的子青因識功夫而成為外國人眼中的異類。	子青笑言盡得母親真傳不愛打扮亦唔化妝，只注重飲食健康。

「喺美國嘅學校只有我一個中國女仔，加上我媽咪開武館，唔少人都會對我好好奇，尤其知道我識功夫之後，有啲人會挑釁我，有啲人就對我敬而遠之，經常會畀人蝦。作為中國人喺外國地方，難免經歷好多歧視，我好想同哥哥講，亦好想有事嘅時候哥哥喺身邊。我同哥哥唔止年紀相差十年，我印象中係冇一齊長大，就算細個大家同住一間屋，但相處嘅時間唔多，我有好多經歷，但都冇對方喺身邊。」

血緣羈絆擊退代溝

縱然地域與年齡的鴻溝佇立在兩兄妹之間，世上卻沒有比血緣更頑強的羈絆。

「其實由細至大，一家人都係好分開，就算同父母都係代溝好大。雖然我同哥哥年紀、同住嘅地方分開得好遠，但喺某啲地方，大家係好相似。就算唔多機會傾偈，感情仍然好強，唔需要講出口，已經可以互相了解。我同哥哥、媽咪性格都好似，大家都係獅子座，性格好強、好固執，想做一件事會放二百分嘅努力去做到最好。」

電影夢不及親情貴

今次子青回港追逐的不止是電影夢，也是與兄長錯過了的寶貴時光，從前仰望着哥哥的小女孩如今已長大成人，可以走進對方的電影世界，創造兩人的共同回憶。

「我從來冇真正喺香港生活過，當年拍電影《見習黑玫瑰》只係幫哥哥手，後來有人請我去荷里活發展，去洛杉磯試鏡，喺當地識咗好多出色嘅電影人同演員，拍咗幾部電影同廣告。我對電影好有興趣，唔止幕前，連幕後都有嘗試，喺美國有開製作公司，自己寫劇本。時間真係過得好快，我覺得自己已經有足夠嘅生活體驗，依家想花多啲時間同哥哥相處，想同哥哥喺同一個地方，向佢學習。」

後記:待人以誠童子心

年逾40歲的子青擁有童顏面孔，眉宇間仍保留着幾分稚氣，笑言皆因盡得母親真傳：「我媽咪好崇尚自然，佢唔打扮亦唔化妝，只專注喺武術方面。我都冇任何特別駐顏之術，不過好注重飲食同健康，我唔食牛同豬肉，主要食蔬果同白肉。」

一個人如何塗脂抹粉也比不上發自內在的健康來得美麗，有人落力賣萌、裝可愛，終不及澄明心靈之純真，子青的稚氣不只於外表，還在於待人的誠懇有禮，說話的率直不矯情，以及如孩童般的真情流露。

髮型：Johnny Lam@IL Colpo Pacific

化妝：Kayan@iMAKEUP WORKSHOP

場地：Everlast Fight & Fitness

採：陳嘉敏

攝：劉智源