鎮宇7億嫌少阿佘爆添食加戲

演員張家輝、古天樂、吳鎮宇、佘詩曼、嘉映影業董事長覃宏、無綫主席陳國強、監製王晶、導演文偉鴻等前晚為電影《使徒行者》慶功，慶祝電影上映至今包括內地、香港及星馬的亞洲總票房已衝破七億港元，單是內地已經錄得逾5億8千萬人民幣，成績驕人。

家輝古仔妙論片酬

鎮宇對於電影衝破七億票房，他笑說：「梗係唔興奮，應該十億八億，得嗰七億咋！希望繼續升啦！」佘詩曼則說：「開心，第一次電影票房有七億。（想唔想再高啲？）咁貪心，當然希望好似鎮宇哥咁講再高啲啦！（希望電影開續集或前傳？）好似度緊。」鎮宇續說：「一次開幾集，連破三集。」問到鎮宇現時十億八億票房是否很容易？他說：「都好難o架，講就咁講啫。」問到阿佘會否加片酬？她說：「希望加多啲戲仲好啦。」鎮宇聞言說：「唔會啦，點會加，合約簽落咗幾年，想加都冇得加。」更對阿佘笑說：「獎勵自己加啲身材，片酬又加。」阿佘尷尬地說：「唔需要喇，希望續集加多啲戲。」

鎮宇細心為阿佘整理頭髮。	張家輝和古天樂這對冤家希望再有機會合作。	古天樂、嘉映影業董事長覃宏（中）與無綫主席陳國強言談甚歡。

張家輝與古天樂一齊接受訪問，對於票房衝破七億，張家輝難以置信地反問說：「係咪o架？計埋非洲嗰邊呀？」古天樂說：「咁咪好開心囉。」講到個人票房最高紀錄，張家輝說：「有份參與梗係《賭城2》、《賭城3》啦，票房好有份參與當然開心啦。」

問到張家輝會否加片酬？他說：「片酬嘅問題永遠都唔係個人可以決定，我話十億，但唔得o架嘛，喺商業世界裏面係一盤生意嚟，你值幾多，要人哋畀你先至係值幾多，所以唔係話我講幾多就得。」古天樂笑說：「我交畀經理人處理，使乜講咁多嘢呀。」張家輝聞言笑說：「呢句得喎！」

翻生延續HeHe情

提到有傳內地限制一線明星片酬，古天樂說：「交畀經理人處理。」問到張家輝可認為內地一線明星片酬過高，有指周迅酬勞過億，他說：「唔可以同人比較，如果投資商認為合理，商業世界運作就係咁。」問到張家輝和古天樂甚麼時候再合作？張家輝說：「《使徒2》啦不如，再續前緣嘛。（你角色已經死咗？）電影世界邊有話死咗唔翻生得o架，只要大家喜歡，死幾多次都可以生。」

文：影視組