金像影后查理絲花朗（Charlize Theron）最近為動畫電影《捉妖敢死隊》（Kubo and the Two Strings）獻聲，升呢媽咪的她透露為「Monkey」配音時經常想起養子積遜，囝囝還認得出她的聲音，但他竟擔心媽咪變成真馬騮。
查理絲榮升媽咪後反而密密接Job，好似她最近便為動畫電影《捉妖敢死隊》中「Monkey」一角配音，跟金像影帝馬修麥康納希（Matthew McConaughey）一齊獻聲合作。查理絲自爆參與《捉》片的原因：「我同馬修都有小朋友，演員通常都接拍認真嘅戲，今次能夠嘗試唔同嘅嘢，真係好吸引！我配音嗰陣不時諗起我個囝囝積遜（Jackson）。」
母愛氾濫的查理絲對於作品相當滿意，最重要是連兒子也十分鍾意：「我囝囝睇完預告片已經好鍾意，而且佢一睇到『Monkey』出場就不停話：『媽咪！好似你把聲呀！』之後佢最大嘅憂慮係確保我跟全世界宣布我真係唔係一隻馬騮！至於囡囡August仲太細，未識睇電影。」
查理絲一向勇於嘗試不同類型的作品，但她對配音工作仍然感到新鮮：「我覺得真係一次全新體驗！係另類嘅說故事方法，跟傳統拍電影相比，將角色建立成有血有肉嘅人嘅方法相當唔同，作為演員我哋通常穿上戲服同換上唔同髮型，就會連走路嘅感覺都唔同。不過今次唔能夠透過肢體表現，比較着重心理方面。」談到聲演的角色「Monkey」，查理絲不忘大讚：「我覺得Monkey係一個出色嘅武士，開始對Kubo好苛刻，但其後就流露出佢嘅母性，為咗保護Kubo同為佢迎接外面嘅世界作準備。」
查理絲最近與馬修雙雙登上雜誌《Parade》最新封面，分別為自家的慈善基金做宣傳，認真善心爆棚！馬修講到他的「Just Keep Living」基金，目的是為孩子提供避風港：「等佢哋遠離街頭暴力或唔使喺家中發呆，為一啲搵唔到同伴嘅孩子搵朋友。」查理絲則成立「Africa Outreach Project」，與馬修的理念相同：「所有馬修所講的都跟來自非洲小朋友告訴我一樣。」同時亦關注愛滋病問題。