鄭欣宜飛上半空慶中秋
歌手鄭欣宜昨日宣傳自家品牌推出的中秋月餅軟曲奇，聲沙沙的她透露近日身體不適，可能與工作太多而缺乏休息有關，記者笑指是「財多身子弱」，她笑說：「我都想！」她又表示對於推出月餅曲奇感到很開心：「都幾驕傲，又好味，成team人都好開心。」
問到會如何慶祝中秋佳節？她透露屆時會去某個地方為10月的演唱會做準備工作，但大賣關子，不肯透露詳情。問到是否會在當地過節？她笑說：「可能會喺空中過！（帶埋月餅過去？）帶一盒去分畀隔籬食。」至於會否提早與父親鄭少秋過節？她自爆日前才齊齊食飯睇戲：「食咗片皮鴨同燕窩，仲以為自己生日！嗰日我同爹哋講就嚟做騷，而細妹（鄭詠曦）又大學畢業，所以幾樣嘢一齊慶祝！」