張敬軒王菀之調情嘴藐藐
張敬軒與王菀之（Ivana）明年2月將首度在紅館合體演出，向來是歡喜冤家的兩人拍攝海報時不忘鬥嘴互窒，但轉個頭就極速回復「恩愛」，不過軒仔大膽攬實人妻Ivana時擺出嫌棄表情，認真抵死！
歌手張敬軒和王菀之這對好拍檔向來合作無間，明年2月16日至18日將首度在紅館合體演出，舉行《The Magical Teeter Totter演唱會2017》，門票將於9月26日在城市售票網公開發售。演唱會名稱意指搖搖板，軒仔笑言兩人的相處模式就似玩搖搖板，一時鬥嘴，一時互攬，Ivana則表示兩人一高一矮、一肥一瘦、一黑一白，加起來就是完美絕配！
軒仔「發火」飛拖鞋
演唱會海報玩味較濃，以「巨人與小人」為主題，服裝設計師特別安排他們穿上情侶間條睡衣，在一張迷你床上打交兼互窒，軒仔被激得除拖鞋掟Ivana，拍攝現場笑聲不斷！軒仔其後換上一件花花外套，頭戴紳士高帽，對着Ivana說：「我呢個造型好靚，件褸由500朵非洲菊做，真係好似開菊展咁呀！」Ivana卻笑指應是「谷氣」！
Ivana自認平日似小人一樣輕盈，軒仔卻有質疑，並說：「乜你真係覺得自己好輕盈？」充滿自信的Ivana立即反擊：「我係Fit咗！」果然歡喜冤家愛鬥嘴！兩人互窒一輪後由「水溝油」變糖黐豆，軒仔挑選相片時更毫不避諱，從後抱着已成為人妻的Ivana，表面是晒溫馨，表情卻一臉嫌棄，惹人發笑！
軒仔與Ivana相識多年，除了工作上默契十足外，私底下感情亦非常要好，Ivana透露兩人經常相約買餸煮飯仔傾心事，軒仔笑說：「買餸係你同蘇生（Ivana老公）做嘅！」軒仔指彼此是最佳拍檔，Ivana聞言強調：「我哋冇嘢o架！」軒仔剛則笑說：「我哋芥蒂就有好多！」
文：音樂組