大衞高柏基最叻冇變有
歌手古巨基年底約滿英皇，他承認有財團投資支持他開工作室，諗頭多多的基仔直言要賺錢養家及幾盤生意，更取笑古太Lorraine大食，要學魔術師大衞高柏飛變魔術，由冇變有，努力賺錢「餵」妻，等古太成功「進化」！
早前本報率先披露古巨基今年11月約滿英皇，據知內地有財團出價2億人民幣給他開工作室，對此他說：「係有人搵過我哋傾，想投資我做工作室。」他表示與英皇關係很好，大家有洽談合作方式，而且特別多謝英皇老闆楊受成：「楊生有好多不同業務，佢要顧嘅範疇好多，但佢對我哋藝人同好多嘢都好關心。」
年賺8千萬？養家嘛！
問可有想過成立個人工作室？基仔坦言多年來，除了歌手身份，也有兼顧幕後工作，如演唱會創作、MV導演、服裝品牌設計等，他說：「你睇到我嘅進化，我最投入將一樣嘢由冇變有，唔係單純表演，點樣形式繼續行，大家再坐低傾吓。（錢係咪重要一環？）錢真係……我都要養我唔同嘅生意。」對於有指一年賺逾8千萬，他笑說：「唔好講呢啲，都係養家啫！」他更以大熱手機遊戲Pokémon Go做比喻，笑言要「養肥」太太Lorraine：「古太好大食，我要捉多啲精靈返嚟換糖嚟餵佢，等古太進化，可以去啲道場度殺。」
鑽研新品食到圓面
基仔的曲奇餅店為迎接中秋節，特別研製了兩款新月餅：「我哋首創軟心芝士手工奶黃月餅，係幾驕傲嘅作品，我哋舖頭芝士甜品幾出名，有三種層次嘅口感，中間芝士係獨立軟心，喺研製期間我試食咗好多！」
此外，昨日是基仔生日，基仔帶同太太飛到台灣出席好友眼鏡店開張，同場還有方中信、宣萱、蕭敬騰等，基仔笑言揀太陽眼鏡最緊要鏡片夠黑：「尤其古太企喺我側邊，夠黑先唔會被古太發現我偷睇女生。」
文：音樂組
攝：劉智源
化妝：Natalie Soo@ND&Co.
髮型：Coren@HAIR
場地：Alice Wild Luscious