傳「拳佬」盲咗！胡定欣爆劇情睇到喊
無綫收視、口碑俱佳的劇集《城寨英雄》下星期日（28日）大結局，坊間傳出多個結局版本，其中有指「拳佬」陳展鵬會盲！監製文偉鴻昨日受訪時大賣關子：「其實之前各大討論區都有話展鵬會盲，呢個消息係我哋放片尾曲MV上網宣傳時已經有，MV入面嘅展鵬好孤獨戴住黑超睇戲，而螢幕上嘅『黑白定欣』就被網民推斷係死咗。（網民推斷屬實？）我只可以話依家我哋掟出嚟嘅物料，大家估得幾多就幾多，正式結局當然要觀眾自己睇，有可能係我哋大整蠱！」
「牙佬」袁偉豪冧掂細路
至於《城》劇演員前晚搞飯局，「牙佬」袁偉豪坦言多了師奶粉絲：「依家小朋友見到我都話要睇牙。（想憑《城》劇攞獎？）順其自然。」定欣則指只跟拍檔搞煞科宴，一直想聚埋再食飯：「收視咁好一定要食餐飯，邊個請都無所謂！監製文偉鴻嘅新片《使徒行者》票房三億，一定要慶祝。」還透露劇情愈來愈催淚，叫觀眾準備紙巾。
另外，定欣昨日出席瑞典Volvo陳列室開幕及新車發布會，指女仔揀車與揀男友一樣要內外兼備。問到準備好接受下一段戀情？她笑言「我Open嘅」！而陳展鵬前晚因出席商場活動而缺席飯局，曾為乒乓球港隊的他即席晒球技，指目前仍有教波：「淨係教好熟嘅朋友。（有靚女學生？）佢哋都要有一定（球技）程度，否則好難教。（剝衫教波？）抹吓汗囉！會喺洗手間換衫。（學生借意親近你？）冇！好規矩。」
文：影視組