藝人何傲兒前晚現身廣州出席老闆林建名80歲生日派對，她透露即場獻唱，又讚對方有情有義：「我邊唱邊跳中國舞，好多人搵我影相。」本月30日80歲生日的林建名，前晚在廣州舉行派對筵開約三十圍，全家總動員出席，他身穿黃色唐裝，如皇帝打扮與家人切蛋糕，問到願望？他說：「大家和諧，唔好咁多暴力、嗌交。」並透露下星期五（26日）會在香港舉行大派對筵開80圍：「分開喺廣州同香港做，係因為有啲廣州朋友過唔到嚟香港，尋晚個派對好高興，主要係見番好多朋友，亦有生意拍檔。」他表示會保持身體健康，待90歲時再次與親友賀大壽。