陳家樂‧衛詩雅哎吔戀人一個眼神叉足電

有緣！點都會遇到！

衛：首先恭喜你終於有機會再圓歌手夢喎！

陳：話時話，真係有十幾年冇唱過歌喇！今次都係得公司高層吳雨「欽點」，拍住陳凱彤走入錄音室，黐到半首歌嚟唱吓。或者大家唔記得咗我係新秀出身，同屆仲有依家嘅萬人迷陳偉霆，不過我鍾意拍戲多啲，當時佢又求吓我咁啦，咪讓畀佢贏囉，哈哈！

衛詩雅	衛詩雅與「細佬」陳家樂之間的感情，已超越一般朋友知己。	頑皮的衛詩雅與陳家樂曾自製「愛情」，但現已各有另一半。

衛：好巴閉咩！我仲犀利啦！未入行已經畀人叫去為電視劇《盛裝舞步愛作戰》試鏡，兼職做模特兒都已經有劇拍喇！

陳：就係因為大家一齊拍呢套劇，所以先認識成為密友，唔知你知唔知呢？其實當年你所屬嘅模特兒公司睇中我嘅陽光味，搵過我簽約，不過我怕畀人呃，到查清楚公司背景資料想去試鏡，但佢哋又嫌我當時嘅紫色爆炸頭太前衞，驚形象唔討好，所以最終都係合作唔成。

衛：唔緊要吖！有緣就點都係有緣嘅，後來我哋咪先後加盟英皇娛樂，又一齊「過檔」英皇電影囉！

拍拖？變咗亂倫喎！

陳：我哋一度傳緋聞喎！問心，我一啲都唔介意。

衛：介意？正中你下懷先啱，當初呢個美麗誤會係我哋製造出嚟o架嘛！嗰時我哋太Friend，有日突然想睇吓傳緋聞會點，跟住有意無意喺人哋面前Sweet啲，點知冇人理我哋喎！估唔到後來約埋行書展，竟然畀人影咗相，仲話我哋拍拖……呢啲咪叫無心插柳囉！

衛詩雅與陳家樂合作拍劇而成為密友。

因相約行書展而被指撻着。

陳：唔知點解我哋由始至終都唔過電。

衛：嘩！你嘅性格同年齡同我親細佬差唔多，同你拍拖咪等於亂倫？

陳：講真，我都覺得你好似我嘅親人一樣，唔知你仲有冇印象呢？4年前某一日，我喺台上唱歌，當時啱啱遇到事業樽頸位，坦白講我心入面盤算緊，呢行其實啱唔啱我做、係咪要離開呢！點知我一望落台，就同你有眼神接觸，當時你堅定嘅眼神令我好有安全感，突然覺得冇咁孤獨，決定點都要奮鬥落去。

努力！各自各增值！

陳：你為咗事業可以去到好盡，不停搵嘢學去增值自己。

衛：某程度上，演戲就係要累積人生經驗嘛！我亦唔希望自己停落嚟，所以一有時間就跑去學好多大家覺得比較冷門嘅嘢，例如攀石、英文書法咁，呢排就報名學中醫，想對草藥同把脈加深認識。我仲會睇好多唔同類型嘅書籍，真係好有得着。好似早排同黃秋生喺馬來西亞拍驚慄片，大家睇片花讚我拍咬自己嗰場戲做足功課，咪就係因為平時嗰啲準備工夫囉！聽到有人讚，真係幾開心o架！

衛詩雅與大前輩秋生合作，獲益良多。

陳家樂憑《破風》在影壇站穩陣腳。

陳：好彩我都有練結他，同成立自己嘅製作公司學剪片啫！雖然做演員，但增值自己點都係好事嚟嘅，為長遠鋪路嘛！

後記：Close過親姊弟

這對「姊弟」感情可能比不少親姊弟還要好，最近「弟弟」經常出埠拍戲，衛詩雅扁嘴說：「有時我都搵佢唔到呀！呢個細佬無論咩事，都可以令我好放心咁暢所欲言，佢唔係好識安慰人，但做嘅嘢就好『啱位』，令人好舒服，況且佢一向好就我。」去年家樂生日，經理人提議到快餐店開派對，身為壽星仔的家樂竟為了「家姐」割愛，衛詩雅說：「快餐店安排咗禮物姐姐送份禮物畀佢，拆開係一盒顏色筆，我好鍾意就去搶，點知佢真係送畀我，事後我先知原來佢都好鍾意o架！」

文：影視組

攝：劉智源

衛詩雅髮型：Sing Tam@O4

衛詩雅服裝：French Connection

陳家樂髮型：Kenrick Siu@The Attic

陳家樂服裝：Kent & Curwen

場地：Hello Kitty Secret Garden