許廷鏗3車串燒撞石壆大難不死
歌手許廷鏗（Alfred）在西九龍公路發生3車連環相撞交通意外，可謂「險死還生」，其座駕車頭被撞至泵把飛甩，幸車毁人未傷；初時頻喊驚的他未有即時入院檢查，定過神後又趕回牙醫崗位狂睇症，無懼剝牙時再遇血光之災的他，表現專業擺出「OK」手勢以示安好。
現年28歲、屬星夢娛樂的許廷鏗（Alfred）是樂壇當紅歌手亦是執業牙醫，近期代表作是新歌《我的志願》MV在Facebook的貼文，於兩日中創下226萬人次瀏覽，成績驕人。昨午Alfred毋須出席公開活動，由歌手變回牙醫，於上午離開荃灣的牙醫診所後，下午再返位於荔枝角的另一診所睇症，原來做回專業牙醫的他跟做當紅歌手一樣，每日連走幾場，行程緊密。
打「白鴿轉」撞甩泵把
約下午1時許，一輛本田私家車向尖沙咀方向行駛，至港鐵南昌站對開時，一輛於鄰線行駛的寶馬私家車疑企圖切線，本田司機見狀急忙扭軚閃避，惟失控打轉，此時，Alfred坐着由司機駕駛的七人車尾隨寶馬駛至，車輛發生碰撞，估計因衝力過猛，Alfred的車打了「白鴿轉」後再衝向石壆，車頭成重災區，泵把都撞致飛脫，車牌、碎片撒滿地，安全氣袋更彈出。事件中，外籍男司機手部受傷，由救護員送明愛醫院治理，姓梁（40歲）寶馬男司機及姓彭（29歲）本田男司機未有受傷，於現場協助調查，受意外影響，事發一段快線需要封閉，有警員到場了解。
Alfred撞車幸只屬有驚無險，沒有受傷，不過剛經歷生死時速，坐在車廂內等候的他，雖戴住口罩遮半邊面，仍難掩驚魂未定神情，面對傳媒提問時表現略呆滯，僅以「OK」手勢作回應。期間見他曾走出車廂企在公路上打電話，之後由友人駕車接走。
報平安食餐好當定驚
Alfred於事發後第一時間在社交網報平安，指「剛發生了一點小意外，發現『出入平安』的重要性，放心，人沒事就好，大家都好好注意安全，好！報個平安再開工。」他返回荔枝角的牙醫診所期間接受電話訪問，頻說：「冇事，冇事，放心。」問到事發經過？他稱只是坐車出外「買嘢」，途中突遇3車連環相撞，聲稱座駕被撞：「我都唔知發生咩事。」問可有受傷？他稱自己「冇事」：「有嚇親囉！（部車爛成點？）部車都幾『甘』，係喺高速公路畀人撞尾，跟住打咗個『白鴿轉』再撞埋壆，車頭個泵把都甩埋。」他稱因報了警，且又要趕回診所睇症，故不便多說。問為何仍要開工見病人？他說：「係呀，返診所定一定神先，我都冇事，一陣約咗客。」又指已通知媽咪他身體無礙。Alfred在診所睇症至近晚上9時才離開，他在社交網留言：「收工！！！！，可以食餐好嘅！當定下驚得唔得先」，還上載了一張「大眼仔p圖」，似乎已平復了撞車驚魂後的心情！
文：音樂組