現年48歲的澳洲天后Kylie Minogue與28歲男友Joshua Sasse訂婚後密密公開晒恩愛，幸福姊弟戀閃盲粉絲雙眼。兩人早前到希臘度假時連環攬錫，打得火熱，最近轉戰到意大利度假亦不減熱情，雖然Kylie未有穿上性感比堅尼，但場面一樣火辣，皆因精力旺盛的Joshua密密「進擊」，日前被拍到與友人食飯時，除了公然狂與Kylie咬耳仔兼又攬又咀，更頭貼頭於Kylie香肩廝磨，而且一手抱女方埋身甚至坐上大髀，冧到Kylie似足少女般甜笑，出手緊箍Joshua，難為身邊的友人睇「真人騷」睇到O晒嘴！