周潤發排隊買飛睇戲觀眾猛讚有型
周潤發前日買票入場支持新片，惹來逾百觀眾爭相「集郵」，有排緊隊的市民讓位畀周潤發先行買票，但他婉拒，堅持做個守規矩的好市民！自拍期間，有「女粉」以周潤發戲中金句「下半世招呼你一個」為偶像打氣，令現場氣氛更添歡樂！
周潤發日前因身在外地而未能出席電影《寒戰2》香港首映禮，揚言回港會買飛捧場的他，前日「找數」特別跟發嫂到鑽石山親身排隊買飛，出錢出力支持電影！他以一身招牌行山Look與發嫂在戲院排隊購票期間，獲排在前面的市民「秒認」，該市民按捺不住大叫：「發哥呀！」不少市民得知周潤發「排隊中」，都立即讓位讓他先購票，但周潤發婉拒好意，依足規矩排隊，並有求必應與市民不停自拍，由三歲至八十歲的粉絲皆有，相當熱鬧！
玩金句「淨係招呼你一個」
周潤發入戲院等候期間被市民「重重包圍」，他把握時間滿足眾人要求自拍，有一名估計已看過電影預告片的女士，「入戲」地用發哥戲中金句打招呼：「我下半世咩都唔做，淨係招呼你一個。」逗得發哥笑說：「吓？淨係招呼我？」因差不多到入場時間，但仍有很多觀眾希望合照，周潤發遂相約大家完場後再影大合照。之後他入場睇戲，完場後與觀眾做個即興的分享會，他笑指兩位偶像郭富城及梁家輝演得很好，場內很多觀眾大叫「發哥好有型」等，他笑說：「我嚟睇場戲！你哋講埋咁多呢啲嘢，我怕今晚瞓唔着喎！」而《寒戰2》在港票房成績愈戰愈勇，截至7月14日，票房為$33,218,640港元！
文：影視組