心痛白內障小妹妹 關詠荷眼紅紅
昨日藝人關詠荷（Esther）以大使身份出席活動，分享之前去尼泊爾災區慈善探訪的經歷，她透露當地有個小妹妹患有先天性白內障，醫好一隻眼後，其母認為已很足夠，故拒絕讓女兒做手術醫治另一隻眼，期間她講到眼紅紅：「真係意想不到，因為我作為媽媽，都希望小朋友可以平安健康，我返到嚟都有同個女講，佢都話點解會咁，我同佢解釋番因為當地人生活太艱苦，所以個媽媽先咁做。」
下次帶埋囡囡去
受訪時Esther表示今次是首次到訪尼泊爾，令她眼界大開。講到她分享經歷時眼紅紅想喊，她說：「因為真係諗唔到個媽媽咁，我哋希望小朋友健康係最緊要，但機會去到面前都唔去醫，所以覺得肉緊。（去到有冇喊？）我OK嘅。」講到她跟女兒分享經歷，問到現年十歲的囡囡可會想同行？她說：「佢今次都想去，但啲期唔啱，我覺得佢可以去，可能下次一齊去。」
講到無綫節目《沒有起跑線？》中有家長提出「贏在射精前」的言論，Esther說：「以前聽人講小朋友出世就要預備佢將來做乜嘢，依家再將件事提前啲，但無可厚非，如果你信呢套嘅話，我佗女都有畀個女聽莫扎特，雖然唔知有冇用，但佢依家都鍾意唱歌。我明白做父母係想小朋友好優質，但去到小朋友出世後，我覺得最緊要係佢開唔開心同願唔願意去學嗰樣嘢。（你係咪怪獸家長？）都有幫佢報興趣班，但上咗一段時間，佢冇興趣就冇再上，而補習基本上中英數都有。」此外，她透露無意復出拍劇，大呻拍劇辛苦。
文：音樂組