陳凱琳吊高嚟賣 同Edwin只限神交
無綫藝員蕭正楠（Edwin）、陳凱琳、黃智賢、姜大偉及湯洛雯等，昨日為新劇《翻生武林》拜神，Edwin透露稍後會與陳凱琳拍攝半天吊的浪漫場面，在空中倒轉、攬實再來個360度轉身，他笑說：「睇完劇本都唔知點拍。（空中咀？）古裝唔會啦，神交就得。近期同翠如都係神交，日日開工，連佢肥定瘦都唔知，靠WhatsApp聯絡。」
收粉紅頸鏈冧爆
而陳凱琳前日25歲牛一被拍得「人肉速遞」上男友鄭嘉穎屋企，她大方說：「係呀！上去會合然後一齊出去同朋友食飯。（唔過二人世界？） 多啲人慶祝開心啲，之前兩個人已經食飯慶祝咗，其實能夠慶祝已經好滿足。原本尋晚要開廠，但延遲咗，所以先食到飯，已經賺咗。（嘉穎送咗咩禮物？）收到條頸鏈，已經戴住。（驚唔驚喜？）驚喜呀！因為之前話見到啱先買，點知佢去咗買禮物，佢知我鍾意粉紅色，揀咗條粉紅色頸鏈畀我，好細心。（加分？）佢不嬲好高分，哈哈！（送12支玫瑰有冇意思？）我諗係浪漫嘅表達。（冧唔冧？）好開心，食完飯佢仲車我返廠開工。」問到黃智賢有否催老友嘉穎結婚？他說：「講咗好耐啦！依家唔講喇！見佢哋咁Sweet都戥佢哋開心。」
為「婆媳」關係煩惱
此外，Edwin昨日在《東網巨星》Facebook玩直播與網友互動，期間露口風「婆媳」出現分歧！有網友問他的留蔭是否真的？他笑說：「點會係假呢？大家覺得留唔留蔭好呢？我同阿媽討論過好多次，媽咪覺得Gel高好睇，翠如覺得跌落嚟好睇，令到我好兩難，令阿媽開心好定翠如開心好呢？」網友搞笑追問若媽咪與翠如跌落水，會救邊個先？他即醒目笑說：「我都唔係好識游水，我會報警向差人求救。」