發臭罐頭益男友 翠如秘撈倒夜香
黃翠如早前為無綫節目遠赴北歐「倒夜香」，更特地購買世上最臭的罐頭返港與朋友分享，極重口味！問會否留一罐留待將來嫁蕭正楠時玩新郎用，她笑言擔心擺得耐會爆！
藝人黃翠如、楊明與許廷鏗等，昨日在將軍澳出席無綫「反斗紅星冇暑假」記者會，身為「反斗」系列節目《打工唔捱世界》主持的翠如BB，早前到瑞典及芬蘭取景，最難忘是在樹屋倒便便：「要抬水上去，又要抬啲便便落嚟，但冇想像中咁難受。」她還特地從瑞典帶回全球最臭的臭魚罐頭作手信，問會否讓男友蕭正楠感受一下，她說：「等大家睇完個節目、有Concept先開，一罐喺屋企，一罐就一班朋友一齊開，因為愈多人愈High！罐嘢有好多指引，一定要喺戶外開，同埋會有好多臭o既液體濺去大家身上。（留番罐等玩新郎用？）我嗰罐要開o架喇！再唔開我驚佢爆。」
楊明未諗生BB
至於另一節目《打工捱世界》的主持楊明則以印度Look示人，他透露早前與袁偉豪到印度拍攝14日，不但要做送飯仔逼火車、在污水中洗衫，還要日日食咖喱撈包，搞到二人發誓幾年內不掂咖喱！「雖然隔咗幾個月又會掛住，但畀我揀，我唔想再去。」對於女友莊思明表示婚後想生一仔一女，他指二人暫未詳談：「但我冇所謂，生小朋友係睇自己照唔照顧到，教得好，生幾多個都冇問題，但搞唔掂（口既）話，一個都太多。」
而主持系列另一節目《嘩鬼上學去》的許廷鏗，早前到台灣體驗高中生活，在台上他被取笑「好多肉可以睇」，所以體育科滿分，認真陰功！
文：影視組