岑麗香抗拒閃婚Step by Step
每個女仔都想化身公主，與王子談戀愛。入行五年的「女神」岑麗香於一年多前終覓得白馬王子，決定拋開藝人框框，享受正常人的拍拖樂趣，即使公然錫錫也不避忌，有信心戰勝這場遠距離戀愛。雖然時下藝人興起閃婚潮，但生於大家庭的香香卻不敢效法，笑指要step by step慢慢plan，並相信一切神自有安排！
去年香香公開戀上現年32歲的6呎猛男Joshua，令一眾宅男粉絲傷透脆弱的心。起初香香對外間反應表現戰戰兢兢，被問到男友事宜也點到即止，小心保護這段萌芽不久的戀情。然而一年後的今天，兩人感情更是甜蜜，香香談起感情事已沒有從前般怕醜，更大方透露維繫雙方感情的竅門是互相遷就……
等Timing唔逼得學遷就
其實so far都叫拍咗一年多少少，係唔係Mr. Right？到時先算啦！做演員要透明度好高，好想私人moment自己享受番。總之現階段開心，暫時唔講咁多。雖然娛樂圈好興閃婚，但我覺得幾時結係唔可以畀期限，Timing啱大家就會知，但我好多屋企人，應該閃唔到啦！幾百人一齊閃唔方便，要計劃嘅，對我嚟講屋企人喺身邊好重要，希望另一半都可以有呢種幸福，順其自然慢慢來，唔可以逼嘅，同埋男友多數都唔喺香港，拍拖梗係想成日見，所以一係我飛，一係佢飛囉！大家都要take care番啲責任，互相就吓同體諒對方感受，係唔容易。有時嗌交又唔係邊個錯，一人一次囉！要提對方有多啲耐性，點都會有解決方法嘅。
遠距離戀愛最怕驚喜
既然你揀得同佢拍拖，都會想有好結果，雖然好多情侶會不時畀驚喜對方，但對我嚟講就唔好搞呢啲嘢。我日日開工，如果佢突然間出現又陪唔到佢，咁對大家唔公平，要喺適當時候，最好唔好喺開工時，盡量去plan溝通多啲，我都唔會突然去加拿大畀驚喜。Long distance戀愛已經唔容易，所以真係要珍惜大家相處時間，依家就再了解吓先。
等神安排做人母生B
近排好姊妹鍾嘉欣宣布就嚟做媽咪，我哋真係好開心，佢開心幸福都戥佢開心。係女人多數都會想有呢樣嘢（做媽媽），但每個人timing唔同，我就冇set定幾時，相信神會安排一切，暫時集中事業先。
大方拍拖開朗釋懷
以我中文程度去到依家咁已經唔容易，依家無論事業、私人感情生活都開心，好多人話我拍拖後開朗好多，其實可能係放鬆咗啫！依家好多女人有事業都同時兼顧到家庭，當日我宣布拍拖都有好多支持，覺得現今藝人都可以做正常人，唔會框住唔可以去dating。初初認拍拖唔知點，又比較新，感情又新，好多說話方面，有時唔想聽都會影響自己，男友安慰番我，記得之前喺停車場畀記者影到同男友一齊（kiss），會唔會再咁公然？講真嗰度係私人停車場嚟，畀人影都控制唔到，我梗係唔想啦！
來港5年思鄉情切
於加拿大生長的香香，5年前隻身來港發展，當時朋友不多之餘，廣東話更是BB班程度，不諱言當時在香港未能找到歸屬感，故日復日機械式工作。每當有假期，即使僅得幾天也不惜搭10多小時飛機返加拿大「叉電」，待回港後再度衝刺。
我覺得每個人都需要假期，尤其係屋企人同朋友都唔喺身邊，見同事平時有家人煲湯都會miss屋企人，所以我都一定要保持關係，就算5、6日都可能會返去。成日做嘢個人會burn out，要搵方法帶歡樂畀自己。其實我都慢慢對香港有歸屬感，以前不停做嘢，就算識新朋友都未必有時間聯繫，依家人輕鬆咗、中文冇咁差，就可以出去同朋友食飯，生活變得balance。以前拍劇拍到好辛苦時會匿埋，跟住有閃出返加拿大嘅念頭，但當然唔可以啦！我覺得自己好幸運，想做演員，香港畀到好多機會同支持我，有時覺得自己演得差，fans就會覺得我演得好，我知係一種鼓勵，所以多謝佢哋。
後記：竹升妹捉字蝨
性格爽朗的香香，每次出現均未見人先聽其笑聲，但基於外國長大，故入行初期接受訪問時不時夾雜英文，當中更鬧出不少笑話。但隨住日復日拍劇，香香的廣東話進步神速，懂得說深奧形容詞之餘，還「升呢」玩捉字蝨笑傳媒。話說當日記者取笑香香事無大小也要向神稟告，卻口快快說錯了是其他信仰，引來香香連番取笑，令小記也哭笑不得，真想說她可謂一時唔偷雞做保長！
文：影視組
攝：吳文聰
髮型：Ivan Lee @ Headquarters
化妝：Zoe Fan