張王幼倫碌爆星級人情卡
「嘉頓新抱」張王幼倫為其基金籌辦的慈善晚會出盡法寶，不但全家總動員幫手，還碌盡人情卡，陳奕迅、劉嘉玲、鍾鎮濤、楊千嬅等齊撐場，星光熠熠。張王幼倫號召力強，經濟不景氣買枱仍十分踴躍，更出現waiting情況，實屬近年少見。
張王幼倫（Michelle）身為領賢慈善基金會創辦人及主席，昨晚舉行慈善晚會，她一早到場打點，並透露以「花園」為主題：「基金會好好彩，得到好多人支持，自己仔女今晚都喺度幫手，阿仔做司儀。今次都得到好多年輕人買枱。（經濟唔係咁好，籌款會否受影響？）又唔係，仲有啲人喺waiting list，因為今次得二十幾圍。」Michelle又謂六月還要籌備古典音樂活動，要到暑假才可休息，屆時將全家去旅行。
陳奕迅任基金大使
昨晚捧場嘉賓有紅星陳奕迅、楊千嬅、林峯與女友吳千語、劉心悠、還有名人二代何超盈、亞洲最大木門製造商余靜淵千金余晚晚、陳柏熹等，而鍾鎮濤與兩女兒則擔任表演嘉賓。基金會青年大使陳奕迅表示，非常欣賞基金會主席張王幼倫，問女兒多接觸藝術嗎？他說：「佢接觸音樂多啲，好鍾意聽歌、睇戲，我覺得OK，因為課本（讀書）好辛苦。（你會教佢唱歌？）我冇文憑，未有資格，但我可以分享。」
提到陳奕迅曾揚言非常欣賞王菲的女兒竇靖童（童童），他坦言想與對方合作：「希望有機會，我真係覺得童童好有型、好正。（啲人留意佢性取向多過音樂？）咁香港讀者相對覺得呢樣嘢特別有興趣，我就好open嘅。（如果你囡囡係同性戀或者同女仔玩得close？）我覺得冇乜所謂，係佢自己選擇自己嘅伴侶，選擇自己嘅路，但我其實覺得肉體唔重要，心靈上嘅溝通重要啲。」
何超盈送袋氹媽咪
剛於北京大學生電影節獲得最受歡迎女演員的楊千嬅，高興表示：「好開心，呢個係我內地第一個電影獎項。」談到母親節，她指囝囝倔強耍性格：「我返到屋企，打開雙手準備攬佢，我睇到佢見到我都好開心，但佢故意掉玩具落地，佢覺得唔可以畀媽咪知道，要有形象！」而何超盈稱母親節代表弟妹送了一個手袋給媽咪梁安琪，當日亦與媽咪一齊於澳門食飯慶祝。
文：名人組