Bob曹永廉憤怒了！鬧紅雨安排差玩殘家長
「紅雨成雙」苦了一眾家長！教育局昨晨「臨時臨急」宣布停課，搞到早已出門上學的莘莘學子及家長猶如「倒瀉籮蟹」，星爸林盛斌（Bob）及曹永廉等於微博留言炮轟有關方面安排失當，令家長甚狼狽，而張智霖（Chilam）更是「無言以對」。
本港天文台昨晨於6小時內兩度發出紅色暴雨警告，首個紅雨警告於早上7時35分發出後，教育局「後知後覺」10分鐘後才對外宣布上午校及全日制學校停課，由於大部分學生已出門趕車返學，紅雨下，不少人搞到衣履盡濕後才得悉不用回校，送小朋友返學的家長頻撲半天「得個吉」！
「唔係第一次」
身為星爸的Bob昨晨於微博上載印有「叻」字的圖片，並留言：「七點七先話紅雨，七點九先話停課，吖，好嘢！」曹永廉隨即轉發再留言：「點解我哋要夾錢養班廢人呢？」不過未幾阿廉刪掉相關轉發，似欲「息事寧人」。
記者隨後與Bob取得聯絡，他似怒氣未消說：「真係唔係第一次嘛，打風又係咁，搞到大家咁狼狽為乜呢？咁大間天文台用咁先進嘅機器都預測唔到？早少少通知咪少啲人鬧囉。好彩我得個大女係返早學啫，我有請司機叔叔送佢，但去到學校先知停課，學校話佢哋乜都冇準備，司機叔叔惟有再車佢返屋企囉。講真，如果啲父母送完返學再要趕返工嘅話，咁樣折騰法真係多得佢唔少喇！」
張智霖：無言
至於曹永廉則無奈苦笑說：「我屋企住大埔，個仔喺九龍塘返學，隧道塞起上嚟一程車起碼要花9至10個字。知道停課嗰陣我太太已經車咗個仔出門，然後又要塞住車咁再揸返轉頭歸家，真係好狼孭，早少少通知就可以解決問題啦。我最嬲係睇即時新聞，見到個個學生都落湯雞咁，相信受影響嘅家長大有人在，唔係得我一個﹗」至於安排兒子入讀國際學校的Chilam就相關問題，以短訊回覆記者說：「無言，不願置評。」
文：影視組