張家瑩急考牌 潛水險爆肺

於2007年當選亞姐冠軍兼得完美體態大獎的張家瑩，當選後便加入亞視，是她人生的第一份工，直至亞視於四月一日黯然熄機，家瑩頓失支柱，感前路茫茫。幸天無絕人之路，最近經好友介紹下，家瑩獲美國著名電視台Discovery Channel邀請，到菲律賓拍攝潛水旅遊節目，全程安排商務位機票及五星級酒店。家瑩得知節目需要她持有潛水牌後，即自認好叻潛水，實情是打「天才波」，急急腳去考牌。

阿Sir狂鬧

必須在極短時間內考到潛水牌的家瑩十分心急，經常搏到盡潛入水底，她充滿鬥志挑戰潛水，惟一下水即感到恐懼：「我一落水就感覺到係另一種恐懼，當我孭上四公斤嘅鉛，仲有個氧氣筒都好重，呼吸已經覺得困難，有啲抽搐，所以我落水嗰刻好驚。」

張家瑩最終克服恐懼，考獲潛水牌！	張家瑩為拍美國潛水旅遊節目而急急腳考潛水牌。	張家瑩目前努力工作，望獲賞識。

由於潛水阿Sir對家瑩有信心，讓她一落水就潛入15米，但去到5米，家瑩開始有「反應」：「我耳仔好痛，因為落得愈深，壓力愈大，期間要不停紓緩耳膜，捏住鼻做反壓動作，但我又呼吸困難，都唔得閒諗隻耳點做反壓動作。我驚萬一爆咗耳膜，失聰咁點算呢？所以當痛到頂唔住，咪即刻按潛水衣一個可即時打脹氣快速升上水面嘅掣，返去水面。」怎料家瑩一上水，就被阿Sir狂鬧，問她：「係咪想爆肺？完全冇做緩衝動作咁上水係好危險！」雖然此事令家瑩留下陰影，但她為做到節目，成功考獲潛水牌，總算如願以償。

恨入無綫

積極搵銀的家瑩昨日出席時裝店開幕活動，輕露事業線，提到她的前同事蔡國威及袁潔儀均加入無綫，她說：「我知道，好恭喜佢哋。」她透露自己早前以觀眾身份參與無綫節目《Sunday好戲王》，並見到很多前亞視員工：「好多人同我打招呼，好開心。其實入去好驚、好陌生，因為冇去過。（恨唔恨入無綫？）想，梗想。見到無綫製作認真，製作規模大。（叫人搭路？）唔敢強求，要人欣賞至得，要努力。」

文：影視組