周秀娜多「侍」幹專人遞拖鞋
周秀娜、鄭欣宜與蔡瀚億昨日為新片拍攝外景，兩位女星分別有四、五位助手照顧，排場墟冚！反觀蔡瀚億就只有一位，略為失色。
昨日周秀娜（Chrissie）、鄭欣宜與蔡瀚億（BabyJohn）到沙田拍攝新片《29+1》，Chrissie與欣宜各自有四、五位助手傍實開工，陣容龐大！反觀BabyJohn只得一位助手，雖然失色但他未有介意，反而覺得助手跟場會影響拍攝情緒：「女仔就唔同，啲妝同頭都要執細緻啲，又怕會走光，所以多啲助手都係正常！」
抹腳板？自己嚟喇！
拍攝內心戲的Chrissie赤腳上陣，拍完一個鏡頭後即有助手遞上拖鞋及添衣，但她亦非「港女」，拍畢後自己一手一腳用濕紙巾清潔腳板。日前放聲氣想拍拖的她笑言，因開工而未有追求者埋身：「幾時都想拍拖啦！睇到好多朋友結婚生仔，都想身邊有人可以一齊相處！」
至於欣宜與BabyJohn則拍攝踩單車、跳舞及吹波波的戲份，欣宜跳舞時左右狂搖，上圍跌蕩相當震撼，跳到不時滿頭大汗，助手即頻頻向她遞毛巾。欣宜透露戲中只有一場戲與Chrissie同場，指對方的角色與平日形象大大不同。Babyjohn於戲中與欣宜是青梅竹馬的好友，兩人最親暱的戲份只是踩單車及深情對望，其中一個鏡頭是欣宜跌低，他即上前用力扶起對方，但出來效果搞笑多於浪漫！
文：影視組