張嘉兒奸計唔易揭穿
前港姐冠軍張嘉兒有份參演的新劇即將播出，首次演奸角的她相當期待劇集播出。嘉兒又指當年因「貪念」而參選港姐，卻「玩大咗」入行至今，更愈做愈開心。去年完成婚姻大事兼碩士畢業的她坦言生活充實又美滿，更ready生B。
無綫新劇《廉政行動2016》即將播映，有份參演的張嘉兒直言期待：「第一次做奸角，之前做得多傻大姐，今次做貪污嘅銀行職員，同本身形象好唔同，好有挑戰但拍得好開心。初初唔可以畀人揭穿我係奸，要點樣去隱藏嗰種奸又要畀觀眾睇到，啲位要拿捏得好啲。」
被批評信心減弱
嘉兒透露當年參選港姐的原因：「當時係貪玩，大學畢業未搵工，好多朋友回流咗返嚟，得我喺溫哥華，咁啱見到溫哥華有香港小姐海報，有機會返香港仲有免費機票，就因為一時貪念想攞張機票返嚟玩，點知事後玩大咗！由玩變咗一份到依家做咗七、八年嘅工，以前完全冇諗過入行。本身主修營養都想朝住呢個方向發展，但入咗行一路做都好開心，見到好多新鮮事學到好多嘢。當初選完好多批評嘅聲音，但我唔識反應，好似煮到埋嚟就食，見招拆招同自己講係推動力，後來真係覺得信心減弱咗。依家學識調節自己心理，唔去睇得咁重，希望大家知道我真正嘅人係點之後開始欣賞我，呢樣嘢仲寶貴。」
生小孩順其自然
去年公共衞生碩士畢業兼嫁作人妻的她笑指生活充實又愉快：「做演員要演戲亦要出好多活動，所有對答都要拎內在識嘅嘢出嚟，去到某個位我覺得好似到咗個limit，所以想增值一吓，加上一向都對健康呢方面有興趣，都叫做諗定後路，到我真係唔做演員時做番老本行都好吖！結婚之後我更加開心，好似有個supporter，咁做啲咩都同老公互相支持。我特別欣賞佢有愛心、錫我又上進。生B都有諗過，順其自然啦。我自己屋企四姊妹，都希望起碼生兩個，最好當然一男一女。我由細到大都有家姐陪，相依為命嘅感覺唔錯，希望將來我嘅小朋友都可以。」
文：陳丹
攝：劉斌
場地：唐宮壹號