伍詠薇爆Chilam邊度最短
伍詠薇主持有線節目《伍姑娘真識食》，新一集邀得好友張智霖（Chilam）擔任嘉賓，自稱「青山院友」的Chilam及伍姑娘未錄影已擦出火花，他大爆二人結伴做瑜伽時曾（目及）伍姑娘屁股：「佢最性感嘅部位一定係pat pat，block住我塊面，不過都挺嘅。」笑言當年首次見她時伍姑娘正爆粗，仍是小朋友的他不懂如何反應，伍姑娘即說當時爆粗因情路上遇「衰人」。
當問到覺得Chilam身體最短是甚麼部分時，伍姑娘抵死地答：「只可以話第二短係腳趾尾，第一短咁多人喺度，唔講得……佢腰短腳長，頭髮又短囉，其他嘢就好長！」令人忍俊不禁。他倆相識超過廿年曾共度輕狂歲月，但伍姑娘不擔心Chilam在節目內「爆料」：「我爛命一條！本來諗住叫埋佢太太上嚟，靚靚話唔想阻住我哋玩，可能佢唔滿意咗我哋好耐喇，哈哈！」
「應該唔係佢杯茶」
若不是遇到靚靚，Chilam會否喜歡上伍姑娘這類型女生，他答：「鍾意到不得了，但我應該唔係佢杯茶。有啲人唔鍾意食魚翅，係都要食粉絲。」伍詠薇即笑道：「我有諗過同靚靚『鍊』，點知『鍊』咗個老練（練海棠）返嚟。」他倆更一起形容「相信同床都唔會有事發生」。
靚靚鬧爆牛鬼蛇神
另外，Chilam日前現身內地一個綜藝節目時，透露自己喜歡食辣消脂。他又趁機向靚靚示愛說：「其實蠻喜歡她胖點，很有安全感。」而靚靚昨日發微博暗示身邊有太多牛鬼蛇神影響夫婦關係，事後她接受電話訪問時說：「我係有感而發，係我兩個朋友因為有第三者喺佢哋面前亂講嘢，發生誤會而絕交。我係寫畀佢哋睇，友誼唔應該受外間影響，發生問題就彼此去了解清楚囉。」
文：影視組