不少荷里活電影鼓吹美國夢，講於發展多元的美國白手追夢可以闖出無限可能，不過近年不少電影有「反思mode」，反烏托邦電影大行其道，嘲諷現實更接地氣。動畫亦見心思，迪士尼去年透過彼思的《玩轉腦朋友》（Inside Out）講自身成長震撼觀眾腦世界，今年自家製作《優獸大都會》（Zootopia）睇社會現實，驚喜寸爆世界「堅‧共融」定「交貨式共融」，撼動人心。
故事講熱血戇直「鄉下兔」立心做正義警察，排除萬難成第一兔警後被派到大城市開工，意外與冤家兼爛仔狐狸搭檔查案，生命影響生命，建立真摯感情。
電影適合大人細路，小朋友睇追夢學做正氣自信友，大人就有反思位。故事以動物喻人類種族，講歧視兼諷刺固有思考影響睇法大有心思，世界有奸狡綿羊，善良狐狸甚至愛速度感的樹獺都並非奇事，顛覆既有思想、求同存異先係真和諧。動畫結局大多大團圓有「離地」感，但今次講盡政客玩政治，挑撥警民關係、扮純良吸取游離選票等，如此「貼地」，加上細節位更見心思，食字寸「烏托邦」及兔版智能手機一絕，值得入場！港版配音的容祖兒有《神經俠侶》影子，繼續「熱血真心Mode」，黃子華演繹完全錦上添花，而令全場笑爆的樹獺，配音更見功不可沒！
文：常歡