黃貫中湊女經:頁頁皆辛酸

歌手黃貫中(Paul)形象硬朗,惟他一提到家中兩位生命中重要的女人時,即露出鐵漢柔情的一面,邊講邊展露幸福的微笑。提到即將於本月9日舉行的演唱會時,他直指囡囡黃鶯會到場支持,又坦言仍未為愛女寫第一首歌,談到湊女經時,Paul笑指自己是囡囡的避難所,更因而經常被老婆朱茵怪責!

早前推出新歌《我有分數》的Paul,歌曲MV由一班「邊青」全權負責,個人演唱會亦將在本月9日舉行,他直言囡囡黃鶯一定會到場支持!

「MV特別搵咗班後生仔幫手,佢哋係社會上嘅少數社群,可能冇書讀或者嚟自單親家庭,我覺得搵佢哋嚟拍好有意思,佢哋諗嘢亦比較天馬行空。個MV我完全冇插手,只係畀咗隻歌佢哋聽、畀啲畫佢哋睇,成果好滿意。同人合作最唔好就係干預,所以我畀晒自由佢哋,一自由咪出到好嘢囉!」

親力親為

「個女一早舉手話要嚟睇!不過當我正打算作首歌畀佢嗰陣佢就窒住我,作咗首《士多啤梨歌》畀我,其實作首歌畀佢好易,但我就係未寫到,或者湊佢呢件事我仍然經歷緊,無論側邊有幾多細路仔,我以為自己好有經驗都好,當真係做咗爸爸嗰陣好多嘢只可以話係『針唔拮到肉唔知痛』!到你要日日餵奶,望住本『餵奶錄』,記低餵奶時間、大小二便時間、幾時嘔奶,依家睇番都頁頁皆辛酸,一日餵13次奶仲邊有得瞓呢?我落手落腳樣樣都親力親為,仲試過摸黑之下餵奶,絕對係一個境界!」

當記者建議Paul將餵奶經驗寫一首歌時,他笑言會考慮,又剖白成為人父至今的改變,一講起愛女即慈父上身,坦言不忍心成為嚴父,教女要交給老婆朱茵!

「送畀大家一首新歌叫《嘔奶再餵奶》,可能會好punk,真係可以考慮吓喎!因為我都苦惱緊唔知用咩角度寫,就係未試過用『嘔奶』,『你嘔奶嘔落我嗰度』,哈哈!以前覺得要我一日餵十幾次奶我會一路怨一路做,但到今時今日我冇怨過,甚至愈做愈開心。雖然講到好辛苦咁,但我係自己搶嚟做,一嚟我固然錫個女,但最重要係唔想老婆咁辛苦,冇理由要佢承擔晒,起碼做一半啦!或者我驚第日一嗌交佢拎出嚟講,咁我就可以話:『冇喎,一人一半!』哈哈!我覺得呢啲嘢唔係你想經驗就會有,咁點解唔去爭取多啲?錢都買唔到!依家我想再好似抱BB咁抱佢,佢即刻好快轉身,仲講咗句:『我唔係BB呀!』呢句嘢第一次拮到我個心,所以我好enjoy呢種攰、呢種唔夠瞓,就算病都一齊病,呢啲經驗真係難能可貴!」

心軟慈父

「媽媽教佢嗰時我會行開啲,我想做嚴父但似乎做唔到,佢都唔驚我,嗲吓我就心軟,日日畀老婆『哦』我,話我企喺側邊都係介入咗,話有能量介入。其實都係嘅,個女嘅世界就係得嗰幾個人,佢已經分好晒咩人有咩功用,爸爸同埋啲長輩好似爺爺、婆婆、姨媽呢啲咪要嚟恰囉。我諗起有一次老婆出咗街,屋企得我同佢,我望住個電視佢就拎咗我個手機嚟玩,突然間個手機拋咗嚟我度,原來係老婆返嚟,咁就睇到我同佢之間關係係點,佢已經知道點利用我呢個避難所,做阿爸真係畀個女食硬,加多兩滴眼淚就仲崩潰!」

「依家同啲都係生女嘅爸爸級朋友傾偈,有啲個女大啲喇10歲就話有男朋友,大家分享吓啲肉赤事,我聽佢哋講都已經覺得好到肉!但我都會畀自由佢嘅,你愈係禁制佢咪愈想去做,你話就話唔理到時靜雞雞目及實佢咪得囉,但唔好畀佢知你監察住佢,細路都一樣有自尊,佢嘅自尊唔會比大人細!」

現今香港的小童及家長都承受極大壓力,更因而出現「怪獸家長」,由playgroup到課外活動,最重要學得夠多!Paul直言不需囡囡學業成績卓越,最着重是品行。

「我想爭取多啲時間教佢好多嘢,唔係淨係教佢咩one、two、three,而係陪佢度過佢好多嘢嘅第一次,咁先會知佢係一個咩人,鍾意啲乜。未來我只係想佢健健康康唔好學壞就足夠,唔使9科A!『書中自有黃金屋』係真,但唔係1歲就推佢去返學就會有黃金屋,着住片去返學我覺得好殘忍!」

放縱政策

「興趣方面我對佢無限放縱,佢鍾意點都得,呢啲唔係我想佢點就點!佢係佢,你係你,只不過佢今日係你個女,但佢都係佢!我鍾意音樂,可能佢最憎音樂呢?如果有一日佢同我講『我覺得你嗰啲係垃圾!』我respect佢o架,如果佢夠膽講。點解依家咁多人成為怪獸家長係因為佢哋想喺仔女身上搵番啲自己冇嘅嘢,但咁樣並唔係正確嘅教育方法。」

後記:返屋企慰妻

老婆朱茵忙住湊女,又接拍了多個內地真人騷,Paul直言心痛,並分享慰妻「驚喜」!「我經常畀佢嘅surprise就係早返屋企!一隻鑽石戒指同早返屋企,問心佢都會揀後者!買鑽石容乜易呢?叫個助手幫我買隻返嚟,之後一個月成日唔喺屋企咁有乜意思?雖然依家我返到屋企佢都叫我行開,咁我咪行遠啲望住佢,呢個就係最大嘅surprise!」

文:陳丹 

攝:秦健輝

場地:PizzaExpress@Kornhill Plaza

化妝:Emma Lee/Amanda But(Emma Lee)

髮型:Matthew Kong@Headquarter

服裝:KOYO