學友睇淡得失城城內斂爭影帝

「第35屆香港電影金像獎」明日舉行，影帝之爭更將當晚節目可觀性推向頂點，入圍者粒粒巨星，包括《踏血尋梅》的郭富城及《暗色天堂》的張學友等，實力各有長處，相信令一眾評審諗爆頭定輸贏。

只旺別人

當周潤發揚言睇好學友今次會成功作「零的突破」時，當事人近日於不同訪問中卻多番柴自己台，一時指「可能自己嘅演技唔啱評審口味」，一時又謂：「先後提名過5次，對呢啲嘢（得獎）感覺淡咗嘞。以前都曾經努力過，尤其拍《男人四十》嗰時，覺得個故事好有創意，加上導演係許鞍華，我好刻意投入咁去演，點知都係唔得。中間出現咗咩原因都好啦，總之似乎就係同金像獎無緣。」

記得當年學友夥拍林嘉欣演出《男》片，初嘗「甜頭」封「印度影帝」。今次再與嘉欣鬥戲，記者笑指或許可借助對方催旺自己，學友幽默回應：「我好統一嘅，得我『旺』人咋，可能佢要養住我添呀。」

城城雖被睇高一線稱帝，但他依然抱平常心面對賽果。	學友與林嘉欣再度合作，默契十足。	城城於《踏》片的內斂演技獲讚。

位位優秀

至於已先後憑《踏》片奪得多個影帝獎座的城城，雖然被同業睇高一線，但他表示抱平常心：「隨緣啦，獎項嘅嘢唔係話你想有就有嘅，況且獎項唔係唯一，更唔代表一切。」談到金像導演劉偉強直指覺得刻下城城的演技，與里奧勒度狄卡比奧異曲同工，城城笑謂：「有人讚係一種鼓勵，當然里奧勒度都係我好欣賞嘅演員啦。（今次演出同以前有咩唔同？）我演一個比自己年齡大嘅警察，本身婚姻失敗仲有個12歲嘅女，呢個角色比較接地氣，人物性格比較溫馴，有別於以往我通常演爆炸力好強嘅角色。（睇好邊個對手？）好難答，個個都係優秀嘅演員，評審挑選得入圍嘅，個個都係好啦。」

最佳男主角提名名單

張家輝《陀地驅魔人》

梁家輝《智取威虎山》

張學友《暗色天堂》

郭富城《踏血尋梅》

劉德華《失孤》

文﹕影視組