蔡楓華壁咚空氣擺甫傾電話
最近積極籌備演唱會兼減肥的蔡楓華（Ken），日前山長水遠由筲箕灣搭$6.5巴士往中環，於快餐店排隊買特價包和細汽水等醫肚。其後Ken行經商場，突然站在一旁講電話，竟然對住空氣「壁咚」，單手按住櫥窗玻璃擺晒甫士，「壁咚」傾了3分鐘後，他又再搭巴士返歸。
曾被封為「白馬王子」的歌手蔡楓華（Ken），當年講了一句「剎那光輝未必係永恒」後，事業即跌至谷底，絕迹樂壇，直至2011年，Ken在好友盧敏儀協助下復出舉行演唱會，由九展唱到紅館，唱過翻尋味的Ken，今年5月又再在文化中心舉行兩場演唱會。
幾啖吞晒
為了在演唱會以最佳狀態示人，Ken最近積極減肥Keep Fit，日前下午4時許，獨自步出位於筲箕灣屋企，附近行了一會再返上樓。約半小時後，Ken換了黑Cap帽和白色波鞋再次離開，到附近搭$6.5巴士前往中環，落車後他即往快餐店排隊買了一個特價包和細汽水，然後搵位坐低食。Ken咬了幾啖已吞晒整個包，坐低唔夠5分鐘就食晒起身走人。
巴士返歸
未知他是否真的減肥成功，過馬路時見他邊行邊抽褲頭，之後進入了附近一間大型藥房，期間見他向店員詢問了幾句，逗留數分鐘步出，人有三急的他再往商場洗手間解決。完事後，Ken電話突然響起，索性停低慢慢傾，不過Ken竟然對住空氣「壁咚」，單手按住櫥窗玻璃，重心微微向前，仲擺晒甫士添！對住空氣「壁咚」傾了3分鐘電話後，Ken又步出商場搭巴士返回筲箕灣寓所。
文、攝：追蹤組