寶珠阿嗲壓力化為動力

梅：梅雪詩　陳：陳寶珠

延續好戲再加場

梅：寶珠，我同你兩年前合作過粵劇《再世紅梅記》後，今年5月我哋將再度攜手合作，演任白四大名劇之一《牡丹亭驚夢》噃，有咩感覺？

陳：默契一定會加深咗o架啦！希望今次成績可以再好啲，可以不斷加場，講個好消息畀你聽，我哋仲加開5月25到5月28日四場演出，總共演出二十場呀！

梅：真開心可以同你合作，希望能夠延續每隔兩年合作一次呢個機會，最好年年做添！有得做我最開心，一切隨緣啦，我會好珍惜！不過其實場地都係一個好大問題，希望有關方面可以正視吓，體恤粵劇界畀多啲場地我哋演出，等多啲劇迷可以欣賞。係呢寶珠，其實今次演出，你有冇咩壓力o架？

陳：唔只一啲，今次演出上都係好大壓力o架！各方面嘅都會有，演出上嘅壓力、又會有票房壓力，但知道今次賣票反應好好，已經加場。最重要每晚保持狀態，要保持自己身體，又希望樣樣順利。

梅：冇錯，最緊要身體保持健康，先可以演出到自己水準。

寶珠與阿嗲再度合演任白戲寶，反應熱烈率先加場。	除了做運動，阿嗲最愛追劇自我Relax。	放大圖片

寶珠與阿嗲敬重師傅白雪仙，今次演出在其指導下獲益良多。	放大圖片	寶珠上堂學跳舞，幸好同學只當她普通人。

電視迷至愛煲劇

陳：係呢阿嗲，你又有咩減壓方法o架？

梅：運動最緊要，平時我都會一個星期做幾日，做完又心思思想再做，去到就好開心。一個人去會所度做運動輕鬆一下，做吓呢樣做吓嗰樣，都會做上癮o架。我比較鍾意一個人去做運動，唔會掛住同朋友傾偈而分咗心。另外好多時都會留喺家中睇電視，我係一個電視迷，乜嘢劇都會睇，最近都有追韓劇，都好傷神o架！有時間會睇吓，各種戲種都會睇。

陳：追劇我唔敢呀！因為一睇劇就會迷咗落去，睇開嗰套你會想睇多集，但睇多集你又想追多集咁o架，所以唔敢追，寧願部劇播完一次過睇番晒。

怕咗仙姐搵碇匿

梅：其實好多人都問我同寶珠，有冇試過合作期間意見不合，實情真係冇！同寶珠合作咁耐同佢好夾，真係冇意見不合，有咩事我哋都商量，我會將師傅教過我嘅造法、構念講番晒出嚟，大家一齊討論同研究點去演繹先係最適合，合作得好好，有唔明咪問師傅仙姐（白雪仙）囉！

陳：我好感激師傅白雪仙給予我哋寶貴嘅意見，一直都想師傅畀意見o架，佢嘅意見對我哋有好大幫助，但都驚o架唔鬧人嘅，但佢一望住你就會好驚o架喇！

梅：師傅唔係鬧係教，唔係惡係嚴肅。我以前都好怕師傅o架，驚到如果佢喺廳，自己會匿埋入廚房！依家就大膽咗。

一周4日舞難度

梅：寶珠，咁你有咩減壓方法，同大家交流吓啦！

陳：最緊要保持健康狀態，因為要演出咁多場。如果有壓力，我會約朋友食吓飯、傾吓偈，有時間會去睇戲，盡量放鬆啲啦！其實演出會好緊張o架，要鬆馳吓。同埋我一直有跟導師做運動同跳舞，要確保身體健康，我規定咗一星期做四日運動，每次都會跳一個鐘頭舞。課堂上有導師、有一班學生一齊跳。佢哋個個好好，有時我做得唔好、跟唔上都會提點我、話我知，課餘大家都有傾偈。

梅：佢哋唔會圍住你簽名咩？

陳：我寧願佢哋唔理我o架，各有各o架，佢哋唔理我，我都唔理佢哋o架！因為做嗰啲同學個個好專心都顧住自己，唔得閒理我。最好唔理我，佢哋個個做咗好耐，初初我都跟唔上，佢哋都有提點我。佢哋個個都好好，上堂時個個都好專心上堂o架。

後記 誠功之道

藝人成功之道，修養與品味才是最重要，寶珠與阿嗲多年來分別獲大批劇迷追隨，當然有其成功的原因。訪問當日事前有個記者會，逾百影迷一早到場等候偶像，當兩人到場時第一時間與影迷誠懇打招呼，會後又再逐個為影迷合照。直到專訪開始，寶珠與阿嗲先在房中午餐及小休，但一見媒體提早到場便立即放下膳食親自招待，還吩咐員工向媒體提供飲料及午饍，相當窩心體貼，完全體會到兩人做事一切由心出發。

文：影視組　

場地：Hotel Icon