祖藍趕不及送別留憾
「香港開心果」盧大偉雖已離世，但「笑聲」長存，還感染不少圈中好友。
王祖藍
「遺憾未能趕返嚟見David哥哥最後一面，飛內地前一晚有探過佢，雖然已經有心理準備，但知道佢一直都好堅強。David哥哥身上流住《歡樂今宵》嘅血，仲係爛Gag始祖、謙卑又忠心嘅基督徒，係我哋後輩嘅榜樣！」
薛家燕
「好唔捨得佢（眼濕濕）！前年我同佢喺一個悼念沈殿霞嘅騷上面，表演佢同肥姐跳過嘅芭蕾舞《天鵝湖》，當時大家好夾，佢仲提議我哋可以一齊出埠登台演番呢隻舞，點知去年中佢就病咗，依家都冇可能做到……」
薰妮
「21歲左右有幸與盧兄合作，成為《論盡天堂》女主角及合演夫婦，本來話演13集，但因受觀眾歡迎，加演至28集，亦因為咁同盧大偉成為老友。一切回憶歷歷在目，恍如尋日發生，佢為人非常搞笑，帶給大家無限歡樂，而且佢有一位咁敬愛佢嘅太太，可謂不枉此生。」
寶珮如
「好難過！我哋一齊返教會一齊坐，佢講好多笑話，好開心！（幫手搞身後事？）有需要即管開聲，可以喺佢安息禮拜中幫手唱聖詩。（慰問盧太？）嫂子愈來愈瘦，相信佢照顧丈夫太頻撲，希望阿嫂振作同節哀！（知道有冇遺願？）想佢太太信耶穌，相信嫂子都接受咗。」
斑斑
「聽到呢個消息好難過、好可惜，佢喺我哋嘅開心果，佢講啲爛Gag真係好好笑，笑到我哋肚攣，好唔捨得！（難忘事？）佢個樣好卡通，無論個樣同動靜都好卡通，令我印象好深。」
