嘉玲皮褸短裙 處女朝聖

國際流行樂壇天后麥當娜（Madonna）的《REBEL HEART TOUR》世界巡迴演唱會澳門站於昨晚假澳門新濠影滙綜藝館盛大舉行，一眾紅星名人空群而出到澳門潮拜偶像，連影后劉嘉玲亦趨之若鶩，豪擲50萬包下豪華私人貴賓廂房，宴請好友包括鄧永鏘爵士與時尚大亨曹其峰等到濠江欣賞演唱會，但老公梁朝偉未有同行。

妒忌鋒菲鬼咁煙韌

昨午四時許，全身黑色型格打扮的嘉玲與好友兼星級髮型師Kim Robinson由香港乘坐直升機前往澳門，抵埗後先前往新濠影滙的玥龍軒中菜館享用晚膳。晚上約9時15分，嘉玲換上銀色閃片衫、皮褸配短裙現身綜藝館，心情勁靚的她在麥當娜的巨型海報面前作狀咀嘴，問到一身打扮是否麥當娜的名曲《Material Girl》造型？嘉玲笑說：「唔係，我係《Like A Virgin》（像個處女）！」她自言對麥當娜的演唱會期待已久，一早已託朋友為她搜羅個唱紀念品。提到麥當娜例牌在騷上向觀眾拋花球，問到會否想接？她說：「唔使！我嚟主要係感受吓氣氛，回味一下，睇吓佢個製作，應該好正。」

劉嘉玲特別邀請了名人好友鄧永鏘與時裝界大亨曹其峰近距離欣賞麥當娜，舉起拇指大讚會場正。	劉嘉玲、郭富城、任達華與太太琦琦及好友邵忠在包廂內自由活動，不時舉機合照。	偕男友張倫碩睇騷晒恩愛的鍾麗緹，希望有幸獲麥當娜邀上台。

不過，嘉玲透露由於偉仔要開工而未能到場，問到有否邀請好友王菲睇騷？她說：「冇啊！佢喺印度，應該未返嚟。（有傳謝霆鋒三次向王菲求婚但被拒？）我唔信呢啲！佢哋係好相愛。（叫佢哋快啲結婚？）我好少見佢哋，佢哋要拍拖，所以匿埋。（佢有異性冇人性？）我都係，但過多一陣佢會搵番我，依家畀佢享受吓最甜蜜、最濃郁嘅時候。（期待佢哋步入教堂？）冇所謂！佢哋都結過婚，最緊要係開心，其實我So Jealous（好妒忌） ，佢哋兩個望住大家對眼會發光。（咁你同偉仔呢？）我哋冇喎！冇咗嗰種熾熱，已經昇華咗。」

舊愛同場不感尷尬

至於性感女神鍾麗緹偕男友張倫碩齊齊捧場，身穿金色閃閃吊帶裙的她透露早前在東京、美國及加拿大捧麥當娜場：「我14歲開始鍾意佢，佢嗰首《Like A Virgin》，我都有學過佢嘅造型，覺得佢好犀利，做啲乜嘢全世界都跟住佢！佢又做好多公益慈善，保養得又好好，係一個好榜樣。」她笑言如果獲偶像邀請上台的話定會暈倒：「如果有機會摸到佢隻手，我一定唔洗手！」她又指若現場撞見前度郭富城，亦不感尷尬。

文：名人組