夏尉喻冧靚仔小豬唔敢揀周星馳
「寸嘴Barbie」夏尉喻日前客串炮製蒸魚，不忍心的她劏魚時卻嘴扁扁！有份參演周星馳新片的她，其無厘頭個性氹得對方相當開心，周星馳更經常叫Barbie亂跳亂演刺激思維！不過講到擇偶，Barbie直言寧願揀「小豬」羅志祥，貪其靚仔又大隻！
形象搞笑的「寸嘴Barbie」夏尉喻在周星馳執導的電影《美人魚》中飾演美人魚家族的電鰻，身材豐滿的她雖也有拋胸演出，但造型「破格」要畫上粗眉及戴假哨牙，向來玩得的她並不介意扮醜，更覺得榮幸，希望靠該片得到更多觀眾留意。
Barbie表示很開心能與兩位男神周星馳及「小豬」羅志祥合作，大讚周星馳有才華轉數快，並非如傳聞中Cool，小豬則靚仔又大隻，講到想揀誰做男友？她說：「我鍾意小豬，外表係我口味，佢有種攝人魅力，明明有場戲我要電佢，但反而畀佢電眼電親！我哋喺片場慢慢培養咗默契，會用手勢互相打氣！」問為何不揀周星馳？她即賣口乖說：「哎呀！佢係萬人迷，有太多選擇，唔輪到我吖嘛。」
亂演亂跳刺激思維
Barbie透露片場趣事連連，周星馳喜歡即場Jam笑料，經常叫Barbie放膽亂演：「佢成日同我講『畀啲嘢嚟揸吓先！』其實係想要人幫手諗橋，可能覺得我都無厘頭，會畀到另類答案，我捉到佢路後，磁場都脗合到！有次佢叫我同林允係咁跳舞，仲讚我跳得好啲，佢又會問大家揀我哋邊個做女友，佢好鍾意問點解，想知大家諗法，好隨和友善。」
踏入新一年，Barbie祝福各位讀者年年有餘、笑口常開！為配合「魚」這主題，Barbie到一所酒家客串做大廚炮製蒸魚，見她撈魚時雞手鴨腳，搞到一身濕，甚少下廚的她更不忍心劏魚，一直匿在師傅身後，扁晒嘴表情搞笑！
文：立影
攝：嚴偉國
場地：醉鍋館／Barry@Oneness