無綫藝人張名雅與歐陽震華為無綫新劇《一屋老友記》拍外景，二人為一場在車內的文戲對戲期間，車尾玻璃窗突然爆裂，名雅稱原來天上飛墮一個鐵錘，幸好未有被掟中，事件未有報警處理。名雅昨日受訪時笑言要買六合彩：「我哋拍一場車內講嘢嘅文戲，冇諗過會咁驚嚇。我哋架車向前駛一小段路期間，突然傳來巨響，車尾玻璃窗爆裂，原來上面跌咗個錘仔落嚟，如果我架車冇駛前，個鎚仔就飛中我個位。（來不及反應？）我尖叫呀！如果真係掟中我都唔知後果會點，真係好恐怖，心都離一離，我仲擔心啲玻璃碎有冇擊中個攝影師，佢話冇事，我先冇咁擔心，佢哋好專業呀！（今次真係好彩？）同事叫我買六合彩！」