靠Winkie搭路羅孝勇約滿抓撈搵諸葛打救
羅孝勇2010年參加《超級巨聲2》，敗給奪冠的林欣彤及亞軍胡鴻鈞，以季軍姿態入行，並迅即和林欣彤傳出緋聞，入行將近六年，羅孝勇緋聞多多，但事業發展卻只是一般，早前更分別約滿無綫及唱片公司Neway，前途茫茫之際傳出他四出探路，有見好友黎美言（Winkie）跳槽到諸葛紫岐旗下的星韜國際娛樂文化作獨立發展後相當不錯，工作接踵而至，故透過Winkie搭路希望和諸葛達成合作。
不忘晒巨鑽
日前傍晚6時多，羅孝勇在監製張家誠陪同下於中環一間餐廳約見諸葛，當日諸葛戴上黑超、身穿粉紅上衣，與兩人雞啄唔斷，講到興奮處更不時揮動戴上巨鑽的玉手。三人在席上言談甚歡，傾了很久，及至離開時羅孝勇更禮貌地護送未來老闆到電梯大堂。
拒主動叩門
記者聯絡上羅孝勇，他直認現時自由身，並說：「當日係有搵諸葛傾吓偈，至於合唔合作呢個世界冇嘢係冇可能。」他表示現時一直有做音樂，最近更拍了4個MV，至於講到主動向各公司叩門，他說：「我係唔會做主動敲門呢樣嘢。」
文、攝：追蹤組