張國榮寸周星馳袋800萬遲埋位
導演高志森執導《家有囍事》已事隔24年，拍攝情景仍歷歷在目，他大爆當年用300萬利誘張國榮（哥哥）「復出」，哥哥更大方表示只袋295萬，事後他「一步一驚心」，怕被哥哥知道周星馳片酬袋800萬，最終煞科日因周星馳顧住食鮑魚，哥哥竟爆出一句：「個800萬仲未埋位呀﹗」
張國榮當年宣布退出娛樂圈移居加拿大，卻經不起高志森導演的游說，出山接拍《家》片，當年創下近5千萬票房，該片近日推出復刻版，於猴年賀歲片檔期「分一杯羹」。有消息指當年哥哥片酬低於周星馳一半有多，高導接受電話訪問坦承：「原本係黃百鳴、林子祥拍哥哥，但係林子祥因家事辭演，最終黃百鳴用咗800萬請周星馳接棒，佢就同我講要用300萬以下成功游說哥哥。哥哥答應之餘仲大方同我講收295萬，淨番嘅5萬係畀面你嘅。當我知道兩位巨星片酬相差咁遠，都驚被哥哥詐型，開工擔心有說話聽，但一直都冇喎，直至煞科嗰日周星馳掛住食鮑魚未埋位，哥哥先講咗一句：『個800萬仲未埋位呀﹗』」
警察傍實剪片
當年因配合韓國市場需要，哥哥拍了一幕揸槍戲卻從未在港曝光，復刻版內終「得見天日」，高導謂：「我都係幾日之前先第一次睇呢場戲，當年係動作導演操刀拍嘅，我就因為發生轟動一時嘅『搶菲林事件』，由3名警察陪同下日以繼夜咁剪片，嗰3位仁兄算《家》片第一批觀眾，佢哋邊睇邊笑到哈哈聲。」
氹掂曼玉上彈
高導又大讚哥哥的演出絕對不止295萬：「嗰日入戲院睇復刻版，哥哥同毛舜筠嘅化學作用令觀眾笑到停唔到，反應比當年更甚。」
至於身為該片監製的黃百鳴亦大讚哥哥當年是劇組的靈魂人物：「記得張曼玉有個愛美神導彈造型，去到現場佢竟然唔肯着戲服，大家煩緊嘅時候，哥哥同我講：『等我搞掂佢啦！』終於擺平咗件事。哥哥份人真係冇得彈，大方又親切。」
文：影視組