張敬軒收祭祀三寶 賀掃男歌手獎
在剛過去的叱咤、勁歌及新城頒獎禮橫掃「男歌手」獎的張敬軒，昨日舉行新碟簽唱會，收到歌迷送上膠花、蠟燭、紅酒如「祭祀三寶」大呼百無禁忌，更與男歌迷牽手擺甫士，自嘲簽唱會HeHe味濃。
張敬軒昨日舉行「新港城x張敬軒『Felix-Me & Mr.Cheung』簽唱會」，歌迷上台與軒仔玩遊戲，分別送上膠花、蠟燭、紅酒向軒仔情深表白，但口多多的軒仔則百無禁忌笑謂：「差個相框就齊晒（祭祀三寶）喎！」期間男Fans又與軒仔手牽手擺出華爾滋舞姿，男Fans望着軒仔更緊張得滿臉是汗，軒仔不禁笑言：「簽唱會嘅開頭基味似乎濃咗少少。」
四台歌王等「食胡」
至於唱片公司特別把軒仔於叱咤、勁歌及新城頒獎禮贏得的九個獎座大晒冷，讓軒仔與獎座來一次「大合照」。問到他可有信心在最後一個頒獎禮「食胡」成為「四台四料歌王」？軒仔笑謂：「想食胡，但怕小相公喎！對歌曲獎有信心啲，個人獎就隨緣啦！」問到於叱咤被柏豪送吻，下個頒獎禮軒仔可會「回吻」？軒仔笑笑口謂：「隨緣啦，最開心係今年頒獎禮氣氛好好，大家良性競爭，亦少咗啲爭崩頭嘅新聞。」
提到有些人批評吳業坤的《原來她不夠愛我》未夠班？軒仔則力撐：「唔係啦，佢首歌係YouTube點擊排第二位，幾百萬點擊好犀利！我有首國語歌儲咗五、六年先有三、四百萬點擊。」
文：音樂組