岑日珈腹痛檢驗子宮生巨瘤
樂壇新進女歌手岑日珈被目睹秘密入院看婦科醫生，神色凝重，據知她子宮內長了一個比拳頭更大的水瘤，一月底將入院動手術切除水瘤，希望大步檻過，吉日天相。
岑日珈（Angie）日前在跑馬地被目睹一臉素顏，着住睡衣外套孭住背囊，獨個兒急步入醫院，見她走到婦產科登記，途中她不停在篤手機，表現得憂心忡忡。她辦理完一輪手續後，由醫護人員安排下入院留醫，原來Angie的子宮生了個巨瘤，已向經理人請了病假，農曆新年前將入院動手術。
影響經期
據知早前Angie不時腹部絞痛，最初她以為是肚痛小事，加上忙於拍攝電影《PG戀愛指引》，所以只是服食止痛藥了事，但之後連經期都受影響，她就開始擔心身體出問題，即急急求診。Angie昨日親口承認生理出了問題：「嗰日去覆診，因為醫生照到我子宮有個水瘤，大得好緊要，我諗有8cm咁大，未知係良性定惡性，我已準備好入院做手術。」Angie表示去年忙於唱歌及拍戲，經常腹痛，但她就不以為意：「因為跳舞比較用力，試過跳跳吓好痛，要食止痛藥。之前仲試過痛到入院，當時醫生話要檢查清楚，因為我生理有問題，試過有成三、四個月冇嚟經期。」
入院開刀
怎知一照超聲波，便發現子宮內長了一個巨瘤，她說：「醫生話係水瘤，嗰陣好驚，唔知良性定惡性。雖然良性可以唔使做手術，但始終驚會變壞，咁大個瘤keep住喺體內都係危險，所以決定做手術。等我錄埋音完成埋手上工作，希望喺二月前入院，之後健健康康過新年。」
文：音樂組