Mr.搲撈無門窮到喊

樂隊Mr.於去年10月頭和環球齊發聲明不再續約，並將於本年中「和平分手」。Mr.近月來似乎消失於幕前，只靠微博才得知五子曾於去年10月尾在廣州開騷及於12月尾與譚詠麟（阿倫）出席廣州活動。據知因不續約，環球對Mr.採取「自生自滅」政策，不為樂隊接工作之餘，更有傳去年11月曾推job，令五子如「蜑家雞見水」收入差上差。最令五子感難捱是在「無收入」下，還要花車費返band房作10幾首歌完成合約上的歌債，可惜有傳這批歌將是推出無期。

Tom有妻兒最辛苦

翻查成員Dash的微博，他在廣州演唱會上曾流下男兒淚：「對，哭過之後就要堅強，那怕解決不了的問題，只要不再逃避一直瑟縮在被窩就對了。」昨日Dash接受電話訪問時稱：「因廣州演唱會應該係我哋喺環球最後一個演唱會，見到6、7千內地、香港歌迷咁支持，所以我同Tom都忍唔住喊。呢個騷喺舊年年頭接，而之後嗰個廣州活動係阿倫關照我哋做嘅，唔關環球事。」有傳遭唱片公司「雪藏」？Dash暗示：「明白嘅，呢個係公司正常嘅政策。」並承認手停口停令經濟上很大壓力，其中以已婚有仔的Tom「最辛苦」。問到可有向環球反映？Dash直言：「有同公司講過想接job，但依家得本月一個酒吧騷。（傳公司幫你哋推job？）好似話因為價錢唔啱，其實以往都有接聖誕或除夕騷，但今年冇。」

Mr.在零收入下仍要作歌還債更面世無期，認真慘情！	Dash在去年10月的廣州騷上，因想到灰暗前程而灑下男兒淚。	葉智強（右） 去年12月尾Mr.幸得譚詠麟帶挈接獲一廣州活動。

半年赤貧還歌債

問到如何生活？Dash也拋開男人的尊嚴謂：「好在我黐屋企住，唔使交租，返屋企食飯又慳一筆，最慘嗰陣係我曾經有幾個月冇家用畀，不過家人好體諒。」問Dash可有為夾Band捱窮而想放棄？他正能量爆燈謂：「唔會放棄音樂，我唔怕講出嚟係想講畀大家知：『Mr.仲未死』，望今年6月前交埋啲歌，我哋可重新出發，唔好以為Mr.一帆風順，喺樂壇好快有成績，其實我哋同普羅市民一樣要面對生活壓力。」

昨日環球唱片公司發言人否認「雪藏」Mr.：「除1月嘅酒吧騷外，3月仲有兩個有錢活動，其實一路都有工作，只係佢哋冇post喺微博啫。（Mr.啲新歌幾時推出？）仲未定喎。」

文：音樂組