周子揚：佢唔認都冇法！
周子揚與何傲兒未能「好來好去」，最近男方自爆分手內幕，表示兩人拍拖期間一直被何父施壓，更大爆何傲芝曾向他苛索每月十至廿萬元生活費，否則不讓他與傲兒來往，之後又要求給予廿萬元解決稅務問題，雖然家境不錯，但子揚表示不想感情事影響家人。
對於傲兒及傲芝發出聯合聲明指他說法全屬捏造，子揚表示不擔心法律追究，繼續企硬：「我講嘅嘢都係事實，唔需要堆砌大話攻擊人，我唔係話要傷害佢哋兩姊妹，但何傲芝真係講過咁嘅說話。」子揚又表示見到聲明感到心痛：「令我諗起我哋四個，張明偉、傲芝、傲兒同我曾經感情好好，一齊去旅行，好多開心回憶，估唔到今日情境變成咁，我相信我哋四個都係有上進心嘅年青人，點解要為呢啲事爭吵！當時我聽到話要問我拎生活費，我同我屋企人都覺得好震驚同恐懼，呢樣嘢長期都喺我心中造成壓力，驅使我講出嚟畀大家聽。」
子揚昨日更接受有線電話訪問，他透露傲芝曾向他表示張明偉已支付十萬，更反問他作為傲兒男友，是否應該支付廿萬？他又說：「佢唔認都冇法，我冇留證據，佢哋影響到我同家人，覺得驚慌。（驚被告誹謗？）講事實，何需擔心？聽講GiGi（何傲芝）好興咁做，但我係表達真實感受。」