方力申再拖5年 先娶鄧麗欣
娛圈情侶方力申及鄧麗欣前晚出席主演電影首映，兩人無懼被同期中外猛片夾擊，set定新片目標收逾千萬票房，又直言兩人合作太多次怕冇新意。不過昨日小方又改口風，本計劃35歲結婚的他要再拖五年才成家立室。
方力申及鄧麗欣（Stephy）前晚與導演葉念琛、石修、李麗珍、邵仲衡、張繼聰及盛朗熙等出席電影《紀念日》首映，Stephy以黑色低胸裝晒排骨胸，直言要豁出去晒女人味！兩人近日忙於宣傳，尚未跟家人吃冬至飯，談到有否票房壓力？小方說：「冇嘅，希望票房好，亦相信會好。（同期對手好強喎！）希望大家都好啦！又唔係諗要贏對方，我哋係同期唯一愛情片，希望票房過一千萬啦！之前幾套都有呢個成績。」
「最後一次要睇好睇喇」
同期對手是《星球大戰7》及《葉問3》，小方指都是系列電影，而今次是兩人與葉念琛的「愛情第4部曲」，同樣有Fans支持：「最唔同係另外兩套可能仲有續集，我哋呢個形式就係最後一次，大家要睇好睇喇！（下次再合作要好唔同？）係啦，劇情都結埋婚，好難再拍都市喜劇，或者拍《人鬼情未了》、《聊齋》嗰啲！」另外，昨日小方接受電台訪問時提及曾講過35歲結婚，他笑言要反口：「有壓力呀！加多五年先，35歲太快喇！」
李麗珍讚拍檔多嘢講
而邵仲衡及李麗珍是繼廿二年前劇集《大時代》後再合作，珍妹指邵仲衡變得健談，以前只會默默匿埋一角，現時則「好多嘢講」，可能已身為兩個兒子爸爸，夠開心！邵仲衡笑說：「一定開心，可以嘅話生多兩個添！」還叫珍妹再生BB，嚇得她擰晒頭，珍妹表示女兒已返港，出席首映前兩母女極速吃了個冬至飯。
至於太陽娛樂文化高層黃柏高（Paco）直言對小方Stephy信心十足，不怕面對強敵，提到公司老闆周焯華高調拖名模Mandy Lieu，正室Heidi嬲爆提出離婚一事，Paco尷尬表示「唔識答」亦不知老闆何時返港。
文：影視組