黃秋生拍唔成《星戰》延遲衝奧
黃秋生早前榮登視帝，其經理人公司英皇前晚為他舉行慶功宴，老闆楊受成、高層霍汶希及老友蘇玉華等紛紛到賀，場面熱鬧。秋生獲老闆送贈金元寶及出自國畫級大師手筆的「三元及第」字畫，他笑謂：「會再執導演筒！老闆話冇問題，嚟緊諗攞奧斯卡囉。其實之前都傾過《星球大戰》，不過就同舞台劇撞咗期，呢啲嘢冇話可唔可惜嘅。」
出書講奮鬥史
談到未來工作動向，秋生表示：「想出書，個名叫《我的戰鬥》，講吓入行以嚟嘅軼事、喺亞視撞鬼，同埋好多年前喺台灣被封殺。（繼續幫無綫拍劇？）初步接觸過。（兩個囝囝有咩表示？）傳咗張相嚟，話『You are the best』咁，會同佢哋食飯慶祝嘅，今次個獎好似好多人一齊攞咁，多謝大家支持。」
要求黃安道歉
席間秋生又自爆台灣藝人黃安拿他與舞台劇拍檔灌錄的歌曲來大做文章：「話我支持政治運動，首歌6月錄，係紀念我哋一班人嘅合作，但運動9月先開始。佢起碼要道歉，事實同時間性嘅嘢冇得呃人。」他稱經理人公司已發律師信給黃安，但黃安昨日拒絕道歉，在微博稱：「我道歉你個屁。」秋生聞言回覆記者表示：「咁我唔回應喇，交畀律師同佢講啦。」
文：影視組