何麗莎人氣升許倩慧受歡迎
新鮮出爐的珠寶小姐被形容為歷屆最高質素，三位模界新秀，被視為珠寶界的掌上明珠，當中Jessica C.師妹何麗莎和Cara G.師妹許倩慧，近日頻頻出現珠寶展，變相成為珠寶展御用模特兒。
由「香港珠寶製造業廠商會」主辦第四屆「香港珠寶小姐」上月圓滿結束，三位得獎珠寶小姐冠軍何麗莎、亞軍許倩慧和季軍吳嘉琪立即履行職務，早前便為連續兩天的珠寶展擔任示範模特兒，而未來兩年的任期內，她們亦會頻頻出席珠寶活動，成為珠寶展常客。
粉絲人數急增
冠軍得主何麗莎曾於馬來西亞當模特兒，自當選後人氣急升，其instagram粉絲已急升至7000，facebook粉絲亦穩步上揚，當上珠寶小姐是否工作量大增？她說：「反而初初工作少咗，因為訓練時好多面試去唔到，最近有啲之前面試過嘅客人，知道我當選，都主動打嚟公司恭喜我，好開心，啱啱又接咗澳門一間酒店的宣傳照工作，工作類型多咗。」
開心戴靚首飾
而亞軍許倩慧身高有179厘米，加上樣子甜美，在場頗受歡迎，她說：「街上未有人認到我，但我啲朋友就已經唔再叫我個名，索性叫我做珠寶小姐，而且示範珠寶嘅好處係可以戴到平時戴唔到嘅名貴珠寶，女仔都鍾意靚嘢，好似上次示範一顆坦桑石戒指，好大粒，好開心，同埋都了解多咗珠寶，以前淨係知道有紅寶同藍寶，原來仲有海藍寶，一向特別鍾意藍色，藍得好靚。」
文：名人組