Bobby王浩信合製東坡房事
藝人歐陽震華（Bobby）、萬綺雯（蚊蚊）及王浩信因合作劇集《東坡家事》成為莫逆之交，三人接受專訪全程充滿笑聲，蚊蚊視大家為一家人，稱呼Bobby做「老爺」、浩信做「細佬」！浩信直指Bobby為人超無聊因此倍感投契，他們又圍攻蚊蚊反應慢笑點低，並笑指她是片場的「潤滑劑」！
歐陽：歐陽震華 萬：萬綺雯 王：王浩信
乜都笑一餐
反應慢的萬綺雯，遇上Bobby和王浩信，難免有點任人魚肉的感覺。幸好蚊蚊以笑點低來彌補反應之不足，實行未到笑位便先笑出來，成為了眾人間的潤滑劑，彼此相處融洽。
歐陽：各位觀眾！睇到我哋三個就知套劇好睇啦！萬綺雯咁養眼，王浩信高大威猛！我呢……
萬：就咁有分量！
歐陽：說出個重點來呀！蚊蚊同我合作之後轉數快咗好多，依家都咁「快」，可想而知未合作之前係幾快！
萬：我老公投訴點解我哋合作咗成套劇，我都慢三秒先識笑，由依家開始，無論你哋講咩都笑一餐先！
歐陽：唔怪得你咁快已經喘晒氣啦！
王：蚊蚊除咗係好演員之外，亦係我哋之間嘅「潤滑劑」！幫大家好快去到好開心嘅氣氛！
歐陽：KY小姐？哈哈哈！
笑點低增信心
王：蚊蚊笑點低，佢一笑，令我哋對自己嘅Gag多咗信心！
歐陽：如果做舞台劇一定要帶蚊蚊去睇，演員最怕台下觀眾冇反應，但佢就咩都笑先，跟住大家都會笑啦！
萬：雖然大家成日笑我，但我又唔覺畀佢哋蝦嘅，難得一班原本唔熟嘅人一嚟就演家庭，氣氛好緊要。
歐陽：其實我細細個就睇你做戲(架)喇！
王：我阿媽都好鍾意睇你！蚊蚊真係我哋自信加油站！
歐陽：聞一聞分外精神！
王：考試都有100分！相信觀眾一定感受到我哋嘅幽默同開心氣氛！
捱冷騷爆肌
王浩信為練得一身結實肌肉，付出戒口的殘忍代價，不過要欣賞他的人魚線，竟一樣要付出血的代價。有位女演員見到浩信剝衫，竟當堂鼻血直流，究竟浩信確有令人噴血的魅力，還是天氣乾燥所致？那就無從稽考了。
歐陽：拍攝期間蚊蚊好似做咗我哋保母，照顧起居飲食，一日五餐。
萬：我會準備大箱零食，總之佢哋一曳一扭眼瞓，我就搵嘢食塞住佢哋把口。
王：佢哋就食，我就齋聞。
萬：因為細佬要騷肌練人魚線，老爺條鯨魚線就唔使練。
歐陽：有幾場戲好佩服浩信，喺大陸拍戲得零下幾度，我哋個個貼到全身暖包，成隻啤牌「階磚9」咁，佢就打大赤肋，見佢啲肌肉都凍到開始縮(架)喇！
王：係有啲難度，因為講我個角色一剝衫就令女觀眾尖叫、流鼻血。
萬：真係有女仔流鼻血喎！
王：導演突然嗌cut，原來有女演員流咗兩行鼻血，佢有解釋，話可能係乾燥啩！但佢個樣好猶豫！
歐：應該真係因為見到你剝衫，乾燥又唔見我流鼻血？
萬：咁點解老爺你冇流鼻血？
歐：因為我「直」囉！
王：佢見到我流鼻血就驚喇！
跟我返入房
Bobby出了名冇厘正經，但原來浩信也潛力無限。二人胡言亂語之間，竟也構思出《東坡家事》的續篇。今次蘇才子出了甚麼事？不是家事國事天下事，而是夫妻關上門的「房事」。
萬：我想爆料，呢兩個男人好煩！佢哋成日黐到實，有場戲細佬同我打咗聲招呼，跟住就衝去老爺度陪佢食風，我同佢哋拜拜都唔理我！有冇咁多嘢講呀？
王：今次係第一次同Bobby合作，開頭我係有小Fans心態(架)！
歐陽：其實我好多年前都有聽你唱歌！
王：我每次睇你演出都覺得好感動！
歐陽：我就聽你唱歌就毛管戙！喂！呢樣係好事嚟(架)！唔係踩呀！聽歌唱比賽勁嗰啲係有呢個感覺！
王：我明白呀！開頭我都仲有少少擔心，但開咗工一星期後就覺得呢個人好無聊，無厘頭到好極致，呢樣嘢同我好似，我覺得呢個人好正，好自然有股衝動去同佢講多啲嘢！
萬：吓？你對佢有衝動？
歐陽：蚊蚊你有所不知，我同你好多戲都係靠演技，唔使再點夾對白，但我同浩信好多對白係現場Jam出嚟！
萬：我嘅作用就係幫老爺你記詩詞歌賦(架)啫！
歐陽：係啦！你幫我記唔少！古人有句說話「書到用時方恨少」，詩同詞其實好唔同……（蚊蚊與王浩信竊竊私語……）
歐陽：你哋做咩？我講緊嘢呀！
從東坡肉學起
王：哈哈！蚊蚊問我咩叫「書到用時方恨少」？真係完美示範，解釋到呢句說話係點解喇！
歐陽：哈哈！「書到用時方恨少」就好似我隔籬位萬小姐咁！講番啲詩詞，詩都好啲有押韻，但詞有長有短，唔明就好難記，有一、兩次蚊蚊都有解釋畀我聽嘅，另外同劇嘅馬賽送咗幅蘇東坡嘅詞畀我，副詞有簡介佢生平，其實我細細個就知道蘇東坡，因為東坡肉吖嘛，睇過生平再了解多啲，知道佢好犀利，琴棋書畫樣樣精，我可以演呢個角色都幾感動！劇入面我個角色有嗰句講嗰句，有義氣，上到朝廷都不畏強權，性格同我有啲似，屋企方面就同蚊蚊有小夫妻鬥氣，我口頭禪係：「咩都唔好講，跟我入廚房」，叫佢煮嘢食，「咩都唔好講，跟我返入房」，咁你話做咩吖？所以呢套劇唔係《東坡家事》咁簡單，直頭可以叫《東坡房事》！
王：咁真係強烈要求如果有好成績，監製可以開套《東坡房事》喎！