田蕊妮 胡定欣 神同步狂喊
昨晚假馬來西亞雲頂舉行的《TVB馬來西亞星光薈萃頒獎典禮2015》出現「雙視后」，田蕊妮及胡定欣憑《鬼同你OT》的「神級同步」雙雙封后，兩人更一齊喜極而泣。而陳展鵬不負眾望，繼新加坡後再憑《張保仔》稱帝。「最喜愛TVB男、女配角」則由袁偉豪及姚子羚奪得。
陳展鵬再奪視帝
視帝陳展鵬繼早前於新加坡得獎後「梅開二度」，可惜他因身在沖繩趕戲未能親身領獎，當無綫獲悉賽果，即通知現場外景隊拍攝他談得獎感受﹐他表示：「終於等到呢個獎，好似發緊夢一樣，我會繼續做好本分，希望大家繼續支持無綫劇集。」
兩位出爐視后阿田及定欣聞得一起封后即變喊包，拖手上台致謝詞不忘互笠高帽，阿田謂：「呢刻感覺永遠唔會忘記，我曾經驚我贏咗定欣會唔開心，依家好開心嘞。定欣係個好演員，佢應得嘅。多謝杜汶澤，成日容忍個老婆唔喺屋企。」定欣則謂﹕「今次係意外收穫，冇諗過大家會咁喜愛同支持。當初我係唱歌入行，點知拍劇一拍拍咗13年。我能夠企上呢個台，多謝田蕊妮﹗」而劇集《張保仔》則獲「我最喜愛TVB電視劇集」。
袁偉豪憑《拆局專家》作出零的突破奪「男配角」，他表示：「諗唔到，好驚喜。喺張繼聰手上搶到呢個獎好開心，因為佢係擔起成頭家嘅好男人，呢個獎送畀我媽咪，多謝我一位非常親密嘅朋友Jennifer（女友岑杏賢）。」「最喜愛女配角」則成《四個女仔三個BAR》姚子羚的囊中物，聞訊後她喜極而泣，又與好姊妹胡定欣擁抱：「好感動，喺呢個台見到好多好姊妹，可以一齊攞獎。好多謝屋企人，臨飛前我媽咪等門等到凌晨3點，好感謝有呢個媽咪。」
「最喜愛TVB飛躍進步男藝員」由楊明奪得，他領獎時謂：「呢個係我入咗行第一個獎，多謝TVB將楊明由零帶到嚟呢度，呢個獎係你哋畀我嘅。」朱千雪獲「最喜愛TVB飛躍進步女藝員」，她上台時表示：「第一次嚟馬來西亞攞獎，相當有意義，多謝TVB、監製潘嘉德及林志華，冇佢哋畀咁多機會，我就冇機會攞獎。」
翠如頒獎畀自己
至於「最喜愛TVB螢幕情侶」安排黃翠如上台自己頒畀自己，她與男友蕭正楠憑《師奶MADAM》獲獎，翠如笑謂：「蕭正楠喺日本同第二個女仔拍緊拖，我個心好唔舒服。多謝監製李艷芳畀我同羅大樹（蕭正楠角色）合作，現實生活中大家又可相處吓。」「最喜愛TVB電視角色」得獎者包括《梟雄》的黎耀祥、《收規華》的張繼聰、林夏薇及楊怡等16人。胡楓獲「TVB星光成就大獎」，以表揚他對演藝圈的貢獻，林憶蓮及林子祥等紛紛拍賀片向他致敬。他表示：「仲以為今晚食白果，點知食尾胡。做咗62年，期間有開心有辛苦，試過3個月內每日瞓個幾鐘，呢個獎得來不易。」
組合農夫與王梓軒打頭陣表演，Rap出搞笑歌詞，例如問洪永城有冇帶黃翠如到場，或將靚女收喺床底。而一眾女藝員性感登場搶鏡，鍾嘉欣的Deep V、林夏薇的事業線及黃翠如的大露背成功吸睛。文：影視組