苟芸慧要做大婆唔吼賽車手

女藝人苟芸慧（苟姑娘）昨日為溥儀眼鏡KEN OKUYAMA太陽眼鏡系列發布會擔任嘉賓，同場還有老闆邱子傑和太太邱李茂琪（Margaret）、以及著名跑車設計師兼該太陽眼鏡品牌創辦人奧山清行。苟姑娘提到早前於澳門參加賽車卻因跑車壞了而未能出賽，而她的腳背亦因練習而瘀傷，對此她說：「呢啲係開心背後嘅代價，無得落場比賽都有少少失望，不過凡事睇兩面，可能我落場嘅話會有意外，依家贏番條命。我始終係賽車場上嘅BB，希望下次可以再出賽，自從呢次出事後我真係鍾意咗賽車，沉迷咗，會再上啲課程同埋要加強訓練先再去比賽，想代表香港。（想做全職賽車手？）希望，不過我知冇辦法可以做到，有工作在身。拍劇嘅話暫時我身體都未ready好，嚟緊會做個賽車嘅節目，好surprise，公司每次畀機會我都會盡力做好。」

拍劇要講timing

而問到迷上賽車的她可會想識個賽車手男朋友？她說：「好難，因為個個都笠住個頭，唔知佢咩樣，不過都識咗一班鍾意賽車嘅朋友。（無遇到啱心水嘅？）佢哋個個心入面都係得車，車係大婆，我接受唔到做二奶。（將來嘅對象一定要將你放喺第一位？）老公一定要啦，起碼要係我排先過啲車，男朋友就冇所謂。」她又表示不急於拍劇，拍劇就如拍拖一樣不能心急，要講timing。她透露現在沒有拍拖也沒有追求者，她會靜待緣分的安排，她說：「依家養好身體先，都要個樣靚番先，單身都幾好，我又有好多girl friends。依家車係我嘅第一位，等我做咗人太太之後先調番個次序。」

（左起）：苟芸慧、奧山清行、邱子傑、邱李茂琪

邱李茂琪曾發生意外，令她對揸車有恐懼。

邱李茂琪怕揸車

而老闆娘Margaret就表示以前在外國讀書時都有揸快車，也試過因超速而遭停牌半年，撞車亦試過，她說：「最嚴重一次係喺天橋度撞咗埋架壞車度，刮花咗一邊，好彩個人無事，但嗰次之後都少咗揸車，有少少恐懼。」她又謂不想仔女駕車。

文：名人組