movin'睡衣開騷變晒病貓
樂隊movin'日前在樓上咖啡店舉行音樂會，全以睡衣上陣，落力演唱之餘又跟粉絲近距離接觸，如邀請猜輸的粉絲上台合唱及安排點唱環節，全場high爆！第三次開騷的movin'主音袁學謙透露今次抱病上陣，雖然身患感冒，但仍頂硬上開騷：「因為呢個騷籌備咗半年，就算身體唔好，都係自己責任，總之On Show係要做番100分。」
提到與粉絲互動，五子表示特地為此選址：「今次冇台，可以近啲睇到晒佢哋嘅眼耳口鼻，打喊露、打乞嗤都睇到晒，感覺好唔同！」講到騷前阿謙預告會騷肌，但最後沒有兌現承諾，他竟以生病為理由走數，其他成員亦幫口：「佢冷親就唔好，畀佢着番多少少衫。」另外，五子透露下月會有新搞作，明年上旬則推出首隻實體碟。