陳鈺芸發力挑戰空中瑜伽

陳鈺芸（JuJu）的「打女」形象深入民心，原來她無論在武術及舞蹈方面都同樣耍家，最近參與大型歌舞表演《黃昏時那條海平線》，並將在明天公演。JuJu說：「呢個係一個跳舞加電影嘅計劃，一年前開始籌備創作，其中一幕仲會加插喺微電影入面。其實我大學係副修跳舞，好多人都唔知我有溫柔一面，可能只留意我打功夫。」

自創新動作

她預告在今次表演中將會使出渾身解數，集空中瑜伽舞、鋼管舞及椅子舞一身，並要邊跳邊唱展示歌喉。其中JuJu為了是次表演特意苦練空中瑜伽舞，幸好本身有功夫底子，所以比其他人更易「升空」：「導師話我學得好快，因為我臂力比較勁，所以好多動作都做到，同埋可以自創好多動作，有時會試吓唔同動作，再交畀導師幫我美化成套舞步。 」

陳鈺芸為了今次的表演，一直秘密進行特訓。	放大圖片	陳鈺芸與合演舞蹈員Irene接受教練Allen的指導。

冇得晒腹肌

另外，JuJu今年年頭曾到美國特訓鋼管舞三個月，自此迷上了這項高難度運動：「因為好運用到全身嘅肌肉，不過返咗香港後冇乜練習，近排先搵老師惡補。」擁有Fit爆身形的她又透露雖然已練成腹肌，不過在表演當日的舞衣比較多布，沒有機會晒肌益粉絲：「件衫唔會點騷到個肚，所以我唔會特登去節食啦，冇需要辛苦自己嘛。」

文：音樂組

場地：Bodywize Yoga Fitness Center

服裝：Gourami