陳慧嫻感情昇華傻女看化
今年踏入五字頭的陳慧嫻由昔日「傻女」變成「美魔女」，歷練多了，女人味濃了，心態也變了。唱腔不再是少女式的歇斯底里，轉玩隨性發揮，在衣着上更來個華麗轉身，預告挑戰「零事業線」Deep V，誓在舞台上由內到外飾演某段美麗故事的主人。
陳慧嫻前年重出江湖推出靚聲發燒碟，翻唱寶麗金年代其他歌手的金曲，今年再下一城將首本名曲重新改編翻唱，推出Hi-Fi碟《Evolve》。歲月繞了一圈，金曲依舊，心境卻轉變了，慧嫻說：「我當年二十歲唱，同依家五十歲去唱，個人經歷咁多嘢，好自然把聲、心態都唔同咗。其中翻唱《傻女》係好大挑戰，再唔係當年咁歇斯底里，反而用好輕嘅方法去唱，隻隻歌唱法都大個女咗，個人都成熟咗，唱歌都比較easy going啲。」
歷練多了，慧嫻在演繹情歌時不再是當年那個激動傻女，反而參透了另一種柔情唱腔，問到是否與難忘的戀愛經歷有關？她說：「唔係好關事，覺得自己聲音天生有種感情喺度，有冇愛情經歷對我唱情歌唔係有太大影響，今時今日我好多嘢睇化咗，放輕咗。」
演繹巨星金曲
慧嫻即將在明年三月再攻紅館舉行演唱會，今次將會挑戰民族風、荷里活歌舞式等舞蹈，並希望揀選一代巨星梅艷芳及張國榮的快歌演唱。在舞衣方面，慧嫻預告性感無極限，因在80年代流行「有肉地」，令當年瘦到皮包骨的她不敢性感示人：「我想Sexy啲o架，我接受到好多嘢，但唔可以刻意賣弄色情囉，有啲嘢做人做咗咁耐都未試過，例如Deep V、露背。」
本以為慧嫻打算夾出事業線「胸」降舞台，怎料她寧做「長平公主」：「我邊有事業線啫？我唔識夾呀，我覺得反而平平坦坦着Deep V仲靚呀，好似天橋上啲模特兒咁。」
文：倪民清
服裝：10thshop
髮型：Tim Lee @ Hair Culture
化妝：Marsha Ma
造型：Queenie Yu