羅霖珍藏鑽飾 兒媳均分

美魔女羅霖為選美活動擔任評判,佩戴名貴首飾,她表示會買時興的珠寶,收藏中最貴有七位數字的鑽飾,更大爆會將珠寶及所有財物平均分配給三位兒子和將來的媳婦。她又謂已諗定平安紙點寫,未雨綢繆,認真思想開放!

羅霖(Candy)昨晚為「香港珠寶製造業廠商會」主辦的2015珠寶小姐競選總決賽擔任評判,打扮性感的她表示喜歡欣賞靚人,不分男女,問到評審的準則?她說:「都係美貌、智慧同身材為主。」她又透露對珠寶設計有興趣,考慮將來退休修讀珠寶鑑證,屆時可以設計珠寶首飾給自己和別人。

專攻襟興款式

Candy又謂是晚佩戴大會提供的珠寶,價值七位數字,問她有沒有收藏珠寶?她說:「我多數收藏錶多啲,同埋翡翠玉器,不過珠寶太貴喇,都係實際啲儲錢買樓。我自己買就會買啲保守啲同襟興啲嘅款式,最貴係七位數字嘅鑽飾。」她自言愛收藏翡翠玉器,因為升值潛力較大。

問到所有收藏是否都留給囝囝和媳婦?她即自爆計劃立平安紙:「我全部嘢都會留畀我三個仔同新抱,包括我啲名牌手袋。錢財身外物,又帶唔走,會畀佢哋三個平均分,唔會偏心。平安紙都諗咗點寫,呢個係新潮嘅做法,唔係有咩事我啲仔拎唔到我啲錢,我依家已經同律師講定,未雨綢繆。」

何倍倩食極唔肥

此外,同樣擔任評判的恒生新抱何倍倩罕有地性感現身,大騷3吋事業線,記者笑指她很性感?她笑說:「唔算好性感,接受到。(老公畀唔畀?)佢OK嘅,啲人好少會話我性感,都係話我骨感多,我係食極唔肥,同埋我鍾意做運動。」她又謂試過增肥而每晚吃兩隻雞蛋,後來被丈夫嗌停,怕她膽固醇超標呢!而朱慧敏、莊端兒與名媛陳君宜亦同場現身,其中朱慧敏認為美麗的秘訣就是開心,又強調現時單身,沒有追求者。

文:名人組