張智霖打親情牌搵靚靚獻聲
張智霖與佘詩曼前晚為電影《十月初五的月光》慶功，祝賀該片在香港、大陸和澳門票房累計逾五千萬人民幣。明年1月開巡迴演唱會的張智霖透露有意邀請太太袁詠儀上台，但袁詠儀當年上台緊張得唱不出口，張智霖希望太太攞出勇氣，從跌低的地方重新站起。
藝人張智霖、佘詩曼、薛家燕、江美儀、張建聲及老闆蕭定一前晚在旺角一間火鍋店舉行慶功宴，為電影《十月初五的月光》祝捷，慶祝電影上映至今總括香港、大陸及澳門票房合共逾五千萬人民幣，成績理想。
「邊度跌邊度起身」
張智霖剛由廣州出席完明年1月舉行的演唱會記招返港，他表示受《十》片在大陸受歡迎帶挈下，演唱會賣飛反應很好，正計劃在演唱會加插《十》元素，或會孭觀眾吹哨子，智霖更表示邀家人上台，他說：「屋企人參與我會安心啲。（老婆袁詠儀會唔會上台﹖）有咁諗過，喺香港試過一場，但嗰場佢可能太緊張唱唔到，睇吓佢有冇勇氣，喺邊度跌低就喺邊度起番身，但我覺得佢上次表現已經好可愛。」
同場的佘詩曼最近到大陸連跑多間戲院宣傳，直言票房成績應可更好，她說：「可能大陸上映戲院唔算好多，或者大家睇多幾次啦。（有網民批評套戲？）我聽到嘅好正面，話電影勾起15年前嘅感覺同回憶。」她又透露12月中將拍《使徒行者》電影版，有傳林峯的角色換上古天樂及張家輝，她表示不知詳情：「當然想原班人馬，但有新加入都係好事。（無綫話下年開網劇版《使徒行者》﹖）喺微博聽人講過，但同時間拍唔到兩邊，做完電影版先啦！」
薛家燕嘆單親苦
屬單親媽媽的家燕姐，對政府作公眾諮詢建議離婚父母應共同撫養子女，她語帶激動說：「共同撫養好事，驚對方唔理啫，仔女係大家嘅，冇理由淨係一方照顧。單親家庭好慘，要照顧小朋友好辛苦，係好難過，做人父母係有呢個責任。」
採訪：影視組